ഹരാരെ: സിംബാബ്വെ-ഇന്ത്യ ഏകദിന പരമ്പരയ്ക്ക് ഇന്ന് തുടക്കം. മൂന്ന് മത്സരങ്ങള്‍ ഉള്ള പരമ്പരയിലെ ആദ്യ അങ്കം ഉച്ചക്ക് 12.45നാണ് തുടങ്ങുക. ട്വന്‍റി 20 ലോകകപ്പിന് മാസങ്ങള്‍ മാത്രം ബാക്കിനിൽക്കെ എത്തുന്ന ഏകദിന പരമ്പര യുവതാരങ്ങള്‍ക്ക് ഏറെ നിർണാകമാണ്. മലയാളി താരം സ‍ഞ്ജു സാംസണ്‍ ഇന്ന് കളിക്കുമോ എന്ന ആകാംക്ഷയാണ് എല്ലാവര്‍ക്കും.
ഒരുകാലത്ത് ഫ്ലവര്‍ സഹോദരന്മാരും ഒലോംഗോയുമെല്ലാം ഇന്ത്യയെ വിറപ്പിച്ചിരുന്നെങ്കില്‍ ഇപ്പോൾ ആറ് വര്‍ഷത്തിന് ശേഷമാണ് ഒരു സിംബാബ്വെ പര്യടനം എന്നതിൽ നിന്ന് മനസിലാക്കാം പരമ്പരയുടെ മൂല്യം. സാധാരണ നിലയിൽ അധികം താത്പര്യം ഉയര്‍ത്താതെ പോകേണ്ട പരമ്പരയെങ്കിലും രോഹിത് ശര്‍മ്മ നയിക്കുന്ന ടീമിലെത്താന്‍ വാശിയോടെ മത്സരിക്കുന്ന ഒരുപിടി താരങ്ങളുടെ സാന്നിധ്യമാണ് കെ എൽ രാഹുല്‍ നായകനായ സംഘത്തിന്‍റെ സവിശേഷത. പരിക്കും കൊവിഡും മറികടന്നുള്ള തിരിച്ചുവരവില്‍ രാഹുല്‍ തന്നെയാകും ശ്രദ്ധാകേന്ദ്രം. ട്വന്‍റി 20യിലെ ഓപ്പണറുടെ റോളാകുമോ ഏകദിനത്തിൽ അടുത്തിടെ പതിവാക്കിയ ഫിനിഷറുടെ ചുമതലയാകുമോ നായകന്‍ ഏറ്റെടുക്കുകയെന്നതിൽ അവ്യക്തതയുണ്ട്.
