ചെന്നൈ: ടിക്ടോക് വീഡിയോയ്ക്കായി ജീവനുള്ള മീനിനെ വിഴുങ്ങിയ യുവാവ് ശ്വാസംമുട്ടി മരിച്ചു. ഹൊസൂര്‍ പാര്‍വതി നഗറില്‍ താമസിക്കുന്ന എസ്. വെട്രിവേല്‍ (22) ആണ് മരിച്ചത്. തേര്‍പേട്ടയ്ക്കടുത്തുള്ള തടാകക്കരയിലാണ് സംഭവം.
മദ്യലഹരിയിലായിരുന്ന യുവാവും സുഹൃത്തുക്കളും തടാകത്തില്‍ മീന്‍പിടിക്കുന്നതിനിടെ മീന്‍ വിഴുങ്ങുന്ന ദൃശ്യങ്ങള്‍ ചിത്രീകരിച്ച് ടിക്ടോക്കിലിടാന്‍ തീരുമാനിക്കുകയായിരുന്നുവെന്നാണ് വിവരം. ഇതേ തുടര്‍ന്ന് ജീവനുള്ള മീന്‍ വിഴുങ്ങിയ വെട്രിവേല്‍ ഗുരുതരനിലയിലായി. ഹൊസൂരിലെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
മൃതദേഹം പോസ്റ്റ്‌മോര്‍ട്ടത്തിനുശേഷം ബന്ധുക്കള്‍ക്ക് വിട്ടു നല്‍കി. സംഭവത്തില്‍ പൊലീസ് അന്വേഷണം ആരംഭിച്ചു.
