തൃശൂർ: അമ്മയോടൊപ്പം രാത്രിയിൽ കിടന്നുറങ്ങിയ യുവതിയെ പുലർച്ചെ കിണറ്റിൽ മരിച്ച നിലയിൽ കണ്ടെത്തി.
തൃശൂർ മാളയിൽ പുത്തൻചിറ മാണിയംകാവ് കൃഷിഭവനു സമീപം മാടശേരിവീട്ടിൽ സിദ്ധാർഥന്റെ മകൾ അഞ്ജലി(20)യുടെ മൃതദേഹമാണ് വീട്ടുമുറ്റത്തെ കിണറ്റിൽ കണ്ടെത്തിയത്.
വെള്ളിയാഴ്ച രാത്രി അഞ്ജലി അമ്മ ആശയോടൊപ്പം പതിവുപോലെ ഉറങ്ങാനായി കിടന്നു. പുലർച്ചെ 4.30 ഓടെ അമ്മ ഉണർന്നപ്പോൾ സമീപത്ത് മകളെ കാണാൻ കഴിഞ്ഞില്ല. മുറിയിൽ മണ്ണെണ്ണയുടെ ഗന്ധവും അനുഭവപ്പെട്ടു.
തുടർന്ന് വീട്ടിലുണ്ടായിരുന്നവരെ വിളിച്ചുണർത്തി അകത്തും പുറത്തും നടത്തിയ അന്വേഷണത്തിൽ വീട്ടുമുറ്റത്തെ കിണറിന്റെ വല നീങ്ങിയിരിക്കുന്നത് കണ്ടെത്തി. പിന്നാലെ നടത്തിയ അന്വേഷണത്തിലാണ് മൃതദേഹം കണ്ടെത്തിയത്.
മാള കോട്ടയ്ക്കൽ സെന്റ് തെരേസാസ് കോളജിലെ അവസാന വർഷ ഡിഗ്രി വിദ്യാർഥിനിയാണ് അഞ്ജലി.
മാള പൊലീസ് സ്ഥലത്ത് പരിശോധന നടത്തി. ഫയർഫോഴ്സും പൊലീസും ചേർന്ന് മൃതദേഹം പുറത്തെടുത്തു.
മരണത്തിൽ ദുരൂഹതയുണ്ടോ എന്ന് പൊലീസ് അന്വേഷണം ആരംഭിച്ചു.