മലപ്പുറം: മലപ്പുറം പാണ്ടിക്കാട് തെരുവ് നായയുടെ ആക്രമണത്തില് നിന്ന് രക്ഷപ്പെടാന് ശ്രമിച്ച അമ്മയുടെ കൈയില് നിന്ന് കിണറ്റിലേക്ക് വഴുതി വീണ് പിഞ്ചുകുഞ്ഞിന് ദാരുണാന്ത്യം. പാണ്ടിക്കാട് തമ്പാനങ്ങാടി ബൈപ്പാസ് റോഡിലെ അരിപ്രത്തൊടി സമിയ്യ-മേലാറ്റൂര് കളത്തുംപടിയന് ശിഹാബുദ്ദീന് ദമ്പതികളുടെ മകള് ഏഴ് മാസം പ്രായമുള്ള ഹാജാമറിയമാണ് മരിച്ചത്.
കുട്ടി മൂത്രമൊഴിച്ചത് വൃത്തിയാക്കാന് കുഞ്ഞിനെയും കൊണ്ട് കിണറ്റിനടുത്തേക്ക് ഇറങ്ങിയപ്പോഴാണ് സംഭവം. നായയുടെ ആക്രമണത്തില് നിന്ന് രക്ഷപ്പെടാന് സമിയ്യ ഓടിയപ്പോള് കാല് കല്ലില് തടഞ്ഞ് കൈയില് നിന്ന് കുഞ്ഞ് വഴുതി വീഴുകയായിരുന്നെന്ന് നാട്ടുകാരും ബന്ധുക്കളും പറഞ്ഞു. ഉടന് തന്നെ പൊലീസും അഗ്നിശമന സേനയും എത്തി കുഞ്ഞിനെ കരക്കെത്തിച്ച് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.