ഇത്തവണത്തെ പുതുവത്സര ദിനത്തിൽ വമ്പൻ റെക്കോർഡ് സ്വന്തമാക്കി മെസ്സേജിങ് ആപ്പായ വാട്സ്ആപ്പ്. പുതുവത്സരദിനത്തിൽ വാട്സ്ആപ്പിലൂടെ 1.4 ബില്യൺ ‘വോയ്‌സ്-വിഡിയോ’ കോളുകൾ ചെയ്തതായാണ് ഫേസ്ബുക്ക് പുറത്തുവിട്ട കണക്കിൽ പറയുന്നത്. ആഗോളതലത്തിൽ വാട്ട്‌സ്ആപ്പിലൂടെ ഒരു ദിവസം വിളിക്കപ്പെട്ട ഏറ്റവും കൂടുതൽ എണ്ണം കോളുകളാണിത്. 2019 ലെ പുതുവത്സര ദിനത്തെ അപേക്ഷിച്ച് 50 ശതമാനം വര്‍ദ്ധനവാണ്‌ ഇപ്പോൾ രേഖപ്പെടുത്തിയിരിക്കുന്നത്.
കോവിഡ് ആഗോളതലത്തിൽ വ്യാപിച്ചതിന് പിന്നാലെ ആളുകൾ ഡിജിറ്റൽ ആശയവിനിമയത്തിലേക്ക് തിരിഞ്ഞതോടെയാണ് വോയ്‌സ്, വീഡിയോ കോളുകൾ കഴിഞ്ഞ വർഷം ഗണ്യമായി വർധിച്ചത്. വാട്സ്ആപ്പ് ഗ്രൂപ്പ് കോളിങ് പരിധി നാല് വ്യക്തികളിൽ നിന്ന് എട്ടാക്കി വർധിപ്പിച്ചതും ഇതിനു ആക്കം കൂട്ടി. വോയിസ്, വിഡിയോ കോളുകൾ തന്നെയാണ് 2020ൽ വാട്സ്ആപ്പിന്റെ ഏറ്റവും വലിയ ഹൈലൈറ്റ്. 2019ലെ പുതുവത്സരാഘോഷത്തിൽ ആഗോളതലത്തിൽ 20 ബില്ല്യൺ വാട്ട്‌സ്ആപ്പ് സന്ദേശങ്ങളായിരുന്നു അയച്ചത്. അതിൽ 12 ബില്ല്യൺ ഇന്ത്യയിൽ നിന്ന് മാത്രം അയക്കപ്പെട്ടതായിരുന്നു. വാട്സ്ആപ്പിന് ഇന്ത്യയിലാണ് ഏറ്റവും കൂടുതൽ ഉപയോക്താക്കളുള്ളത്. സമീപ കാലത്താണ് വാട്സ്ആപ്പ് ഇന്ത്യയിലെ യൂസർബേസ് 400 മില്യൺ തികച്ചത്.
