ഇംഗ്ലണ്ടിനെതിരായ ഏകദിന പരമ്പരയ്ക്കുള്ള വെസ്റ്റ് ഇന്‍ഡീസ് ടീമിനെ പ്രഖ്യാപിച്ചു. 15 അംഗ ടീമില്‍ രണ്ട് അണ്‍ക്യാപ്ഡ് ഓള്‍റൗണ്ടര്‍മാര്‍ ഇടം നേടി. മൂന്ന് ഏകദിനങ്ങളും അഞ്ച് ടി20യും അടങ്ങുന്നതാണ് പരമ്പര. സര്‍ വിവിയന്‍ റിച്ചാര്ഡ്സ് സ്റ്റേഡിയത്തില്‍ ഡിസംബര്‍ 3 നാണ് ഇംഗ്ലണ്ട്-വെസ്റ്റ് ഇന്‍ഡീസ് ആദ്യ ഏകദിനം.
നിക്കോളാസ് പൂരനും ജേസണ്‍ ഹോള്‍ഡറും ഇല്ലാതെയാണ് വിന്‍ഡീസ് ഇറങ്ങുന്നത്. പൂരന്‍ ടി20 ക്കും, ഹോള്‍ഡര്‍ ടെസ്റ്റ് ക്രിക്കറ്റിനും മുന്‍ഗണന നല്‍കുന്നുവെന്ന കാരണം പറഞ്ഞാണ് ടീമില്‍ നിന്നും ഒഴിവാക്കിയിരിക്കുന്നത്. ഡിസംബര്‍ 3, 6 തീയതികളില്‍ ആന്റിഗ്വയിലെ സര്‍ വിവിയന്‍ റിച്ചാര്ഡ്സ് സ്റ്റേഡിയത്തിലാണ് ആദ്യ രണ്ട് മത്സരങ്ങള്‍. ഡിസംബര്‍ 9 ന് ബാര്‍ബഡോസിലെ കെന്‍സിംഗ്ടണ്‍ ഓവലിലാണ് അവസാന മത്സരം.
ഷെര്‍ഫെയ്ന്‍ റൂഥര്‍ഫോര്‍ഡും മാത്യു ഫോര്‍ഡുമാണ് ടീമില്‍ ഇടംനേടിയ ഓള്‍റൗണ്ടര്‍മാര്‍. ഷായ് ഹോപ് വീണ്ടും ടീമിനെ നയിക്കും. അല്‍സാരി ജോസഫാണ് പുതിയ വൈസ് ക്യാപ്റ്റന്‍. പരിചയസമ്പന്നരായ വിക്കറ്റ് കീപ്പര്‍/ബാറ്റ്സ്മാന്‍ ഷെയ്ന്‍ ഡൗറിച്ച്, ഓപ്പണര്‍ ജോണ്‍ യോഹാന്‍സ് ഒട്ട്ലി എന്നിവര്‍ ടീമില്‍ തിരിച്ചെത്തി.
