തിരുവനന്തപുരം: സംസ്ഥാനത്ത് അതിശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ്. എല്ലാ പൊലീസ് സ്റ്റേഷനുകളിലേക്കും അഗ്നിശമന സേനാ വിഭാഗങ്ങള്ക്കും ജാഗ്രതാനിര്ദേശം നല്കിയിട്ടുണ്ട്. 21 സെ.മീ. വരെ മഴ കേരളത്തില് ലഭിക്കുമെന്നും ഈ സാഹചര്യത്തില് മുന്കരുതല് ശക്തമാക്കണമെന്നുമാണ് ജില്ലാ കലക്ടര്മാര്ക്കും നിര്ദേശം നല്കിയിട്ടുണ്ട്. മത്സ്യത്തൊഴിലാളികള് 30 വരെ കടലില് പോകരുതെന്നാണ് ജാഗ്രതാ നിര്ദ്ദേശത്തില്.
ഉരുള്പൊട്ടല് സാധ്യത ഉള്ളതിനാല് രാത്രി ഏഴു മുതല് രാവിലെ ഏഴു വരെ മലയോര മേഖലയിലേക്കുള്ള യാത്ര പരിമിതപ്പെടുത്താന് പൊലീസിനു നിര്ദേശമുണ്ട്. 28 വരെ സംസ്ഥാനത്ത് അതിശക്തമായ മഴ ലഭിക്കും. 25നു ശക്തമായ മഴയും ശനിയാഴ്ച അതിശക്തമായ മഴയും ലഭിക്കും. 12 മുതല് 20 സെ.മീ. വരെയായിരിക്കും ശനിയാഴ്ച മഴ ലഭിക്കുക. മുന്നറിയിപ്പു ശ്രദ്ധയോടെ കണക്കാക്കണമെന്നാണ് സംസ്ഥാന ദുരന്ത നിവാരണ അതോറിറ്റി നിര്ദേശിച്ചിരിക്കുന്നത്.
