ഹാച്ച്ബാക്ക് വാഹനമായ പോളോ, സെഡാന്‍ വാഹനമായ വെന്റോ എന്നിവയ്ക്ക് ഓഫറുകള്‍ പ്രഖ്യാപിച്ച് ജര്‍മ്മന്‍ വാഹന നിര്‍മ്മാതാക്കളായ ഫോക്സ്വാഗണ്‍. സെഡാന്‍ മോഡലായ വെന്റോയില്‍ ആറ് വകഭേദങ്ങളാണ് ഉള്ളത്. ഇവയില്‍ മിഡ്-സ്പെക്ക് വകഭേദമായ കംഫര്ട്ട്ലൈന് ആണ് പരമാവധി ഓഫറുകള്‍ ബ്രാന്‍ഡ് നല്‍കിയിരിക്കുന്നത്.
ഫോക്സ്വാഗണ്‍ വെന്റോയുടെ മിഡ്-സ്പെക്ക് കംഫര്‍ട്ട്‌ലൈനിലെ (നോണ്‍-മെറ്റാലിക്) വകഭേദത്തിന് സാധാരണയായി 9.99 ലക്ഷം രൂപയാണ് വില. ഈ മാസത്തേക്ക്, ജര്‍മ്മന്‍ ബ്രാന്‍ഡ് ഇത് നിങ്ങള്‍ക്ക് 8.39 ലക്ഷം രൂപയ്ക്ക് വില്‍ക്കുമെന്നാണ് റിപ്പോര്‍ട്ട്. ഏകദേശം 1.6 ലക്ഷം രൂപയൂടെ ഓഫറാണ് ഈ പതിപ്പില്‍ ലഭിക്കുക. അതുപോലെ തന്നെ വെന്റോയുടെ ഉയര്‍ന്ന വകഭേദമായ ഹൈലൈന്‍ പ്ലസ് മാനുവല്‍ പതിപ്പിന് 12.08 ലക്ഷം രൂപയാണ് എക്സ്ഷോറൂം വില. ഏകദേശം 1.09 ലക്ഷം രൂപയുടെ കുറവാണ് ഈ പതിപ്പിലും വരുത്തിയിരിക്കുന്നത്.
പോളോ ശ്രേണിയില്‍ നിന്ന്, ഈ മാസം മൂന്ന് വകഭേദങ്ങള്‍ക്ക് ആനുകൂല്യങ്ങള്‍ ലഭ്യമാണ്. പോളോയുടെ പ്രാരാംഭ പതിപ്പായ ട്രെന്‍ഡ്‌ലൈന്‍ (നോണ്‍-മെറ്റാലിക്) ഏറ്റവും വലിയ ആനുകൂല്യം ലഭിക്കുന്നു. 5.88 ലക്ഷം രൂപയാണ് ഈ പതിപ്പിന്റെ എക്സ്ഷോറൂം വില. എന്നാല്‍ ഉപഭേക്താക്കള്‍ ഈ മാസം 29,000 രൂപയൂടെ ആനുകൂല്യമാണ് ഈ പതിപ്പില്‍ ലഭിക്കുന്നത്. ഇതോടെ 5.59 ലക്ഷം രൂപ എക്സ്ഷോറൂം വിലയില്‍ ഈ പതിപ്പ് സ്വന്തമാക്കാം. മിഡ്-സ്പെക്ക് പോളോ കംഫര്ട്ട്ലൈന് (നോണ്‍-മെറ്റാലിക്) ഇപ്പോള്‍ 6.59 ലക്ഷത്തിന് ലഭ്യമാണ് (6.82 ലക്ഷത്തില്‍ നിന്ന് 23,000 രൂപ കുറഞ്ഞു). ഏറ്റവും ഉയര്‍ന്ന പതിപ്പായ പോളോ ഹൈലൈന്‍ പ്ലസ് 7.89 ലക്ഷം രൂപയ്ക്ക് സ്വന്തമാക്കാം. സ്റ്റാന്‍ഡേര്‍ഡ് വിലയായ 8.09 ലക്ഷം രൂപയില്‍ നിന്നും 20,000 രൂപയുടെ കുറവാണ് വരുത്തിയിരിക്കുന്നത്.
