ചൈനീസ് സ്മാർട്ട്ഫോൺ നിർമാതാക്കളായ വിവോ കഴിഞ്ഞ വർഷം അവസാനത്തോടെ വിപണിയിൽ അവതരിപ്പിച്ച V20 ശ്രേണിയിലെ സ്മാർട്ട്ഫോണുകളുടെ വില കുറയ്ക്കുകയാണ്. കഴിഞ്ഞ മാസമാണ് V20 ശ്രേണിയിലെ വിലക്കുറവുള്ള മോഡൽ ആയ V20 SE-യുടെ വില വിവോ 1000 രൂപ കുറച്ചത്. ഇതിനു പുറമെ സ്റ്റാൻഡേർഡ് മോഡൽ ആയ വിവോ V20 യുടെയും വില കുറച്ചു.
2000 രൂപയാണ് വിവോ V20-യ്ക്ക് കുറച്ചത്. 24,990 രൂപ വിലയുണ്ടായിരുന്ന 8 ജിബി റാം + 128 ജിബി സ്റ്റോറേജ് പതിപ്പിന്റെ വില ഇതോടെ 22,898 രൂപയായും 27,990 രൂപ വിലയുണ്ടായിരുന്ന 8 ജിബി റാം + 256 ജിബി സ്റ്റോറേജ് പതിപ്പിന്റെ വില 25,490 രൂപയായും കുറഞ്ഞു. വിവോ വെബ്‌സൈറ്റിലും ആമസോൺ, ഫ്ലിപ്കാർട്ട് തുടങ്ങിയ ഈകോമേഴ്‌സ് വെബ്‌സൈറ്റുകളിലും പുതിയ വില ലിസ്റ്റ് ചെയ്തിട്ടുണ്ട്. ആൻഡ്രോയിഡ് 11 ഓപ്പറേറ്റിംഗ് സിസ്റ്റം അടിസ്ഥാനമായ ഫൺടച്ച് OS 11 ആണ് വിവോ V20-യുടെ ഓപ്പറേറ്റിംഗ് സിസ്റ്റം. 6.44-ഇഞ്ച് ഫുൾ-എച്ച്ഡി+ (1,080×2,400 പിക്‌സൽ) അമോലെഡ് ഡിസ്പ്ലേയാണ് ഹാൻഡ്‌സെറ്റിന്. 20:9 ആസ്പെക്ട് റേഷ്യോ ഈ ഡിസ്‌പ്ലേയ്ക്കുണ്ട്.
ഒക്ടോബറിൽ വില്പനക്കെത്തുമ്പോൾ ഒക്ടകോർ ക്വാൽകോം സ്നാപ്ഡ്രാഗൺ 720G SoC പ്രോസസ്സർ ആയിരുന്നു വിവോ V20-യിൽ. എന്നാൽ ഡിസംബറിൽ ക്വാൽകോം സ്നാപ്ഡ്രാഗൺ 730G SoC പ്രോസസ്സറിലേക്ക് അപ്ഗ്രേഡ് ചെയ്തു.
