തിരുവനന്തപുരം: ‘വിദ്യാകിരണം’ പദ്ധതിയുടെ ഭാഗമായി ഓണ്ലൈന് പഠനത്തിന് ഡിജിറ്റല് ഉപകരണങ്ങള് ആവശ്യമുള്ള ഒന്നു മുതല് പന്ത്രണ്ടുവരെ ക്ലാസുകളില് പഠിക്കുന്ന മുഴുവന് പട്ടികവര്ഗ വിഭാഗം വിദ്യാര്ഥികള്ക്കും പുതിയ ലാപ്ടോപുകള് ലഭ്യമാക്കുന്ന പദ്ധതിയ്ക്ക് മുഖ്യമന്ത്രി പിണറായി വിജയന് തുടക്കം കുറിച്ചു. തിരുവനന്തപുരം ജില്ലയിലെ ജി എച് എസ് വാഴമുട്ടം സ്കൂളിലെ പ്രഥമാധ്യാപകന്റെ സാന്നിധ്യത്തില് അഞ്ചാംക്ലാസ് വിദ്യാര്ഥിനിയായ ലക്ഷ്മി ജയേഷിന് ആദ്യ ലാപ്ടോപ് നല്കിയാണ് മുഖ്യമന്ത്രി വിതരണോദ്ഘാടനം നടത്തിയത്.
ഇതോടൊപ്പം 10, 12ക്ലാസുകളില് പഠിക്കുന്ന സാമൂഹ്യ പങ്കാളിത്തത്തോടെ ഉപകരണങ്ങള് ആവശ്യമുള്ള മുഴുവന് പട്ടികജാതി വിഭാഗത്തില്പെട്ട കുട്ടികള്ക്കും ഈഘട്ടത്തില്ത്തന്നെ ഉപകരണങ്ങള് നല്കും.പതിനാല് ജില്ലകളിലുമായി45, 313കുട്ടികള്ക്കാണ് ആദ്യഘട്ടത്തില്ലാപ്ടോപുകള് ലഭ്യമാക്കുന്നത്.
പട്ടികവര്ഗ വിഭാഗം കുട്ടികള്ക്ക് ഏറ്റവും ആദ്യം ഉപകരണങ്ങള് ലഭിക്കാന് സ്കൂളുകളില് ഹൈടെക് പദ്ധതിയുടെ ഭാഗമായി കൈറ്റ് വിന്യസിച്ച ലാപ്ടോപുകള് തിരിച്ചെടുത്ത് നല്കുന്ന പദ്ധതിയ്ക്ക് സര്കാര് തുടക്കമിട്ടിരുന്നു.എന്നാല് തുടര്ന്ന് കെ എസ് എഫ് ഇ, കുടുംബശ്രീ വഴി നടപ്പാക്കുന്ന ‘വിദ്യാശ്രീ’ പദ്ധതിയുടെ ഭാഗമായുള്ള ലാപ്ടോപുകള് ‘വിദ്യാകിരണം’ പദ്ധതിയ്ക്ക് വേണ്ടി ലഭ്യമായ സാഹചര്യത്തിലാണ് ഇപ്രകാരം ആദ്യഘട്ടത്തില് ലാപ്ടോപുകള് കുട്ടികള്ക്ക് നല്കുന്നത്.
രാജ്യത്ത് ആദ്യമായാണ് ഒരു സംസ്ഥാനത്തെമുഴുവന് പട്ടികവര്ഗ വിഭാഗം വിദ്യാര്ഥികള്ക്കും ലാപ്ടോപുകള് ഉറപ്പാക്കി ഓണ്ലൈന് പഠനം ആരംഭിക്കുന്ന സംവിധാനത്തിന് കേരളത്തില് തുടക്കമിടുന്നത്.നവംബര് മാസത്തില് തന്നെ വിതരണം പൂര്ത്തിയാക്കുമെന്നും മുഖ്യമന്ത്രി പറഞ്ഞു.