അജിത്ത്, വിജയ് മത്സരവുമായി ‘വരിശും’ ‘തുനിവും’ ; 9 വര്‍ഷത്തിനു ശേഷം ഒരേ ദിവസം റിലീസ്

ന്‍പത് വര്‍ഷങ്ങള്‍ക്കു ശേഷം ആരാധകര്‍ക്ക് ആഘോഷിക്കാന്‍ അജിത്ത്, വിജയ് ചിത്രങ്ങള്‍ ഒരേ ദിവസം തിയറ്ററുകളിലെത്തുകയാണ്. അടുത്ത വര്‍ഷം പൊങ്കല്‍ സീസണില്‍ ആണ് ഇരുവരുടെയും ചിത്രങ്ങള്‍ ഒരുമിച്ച് തിയറ്ററുകളില്‍ എത്തുക. തമിഴ് സിനിമാ പ്രേക്ഷകരുടെ കൂട്ടത്തില്‍ ഏറ്റവുമധികം ഫാന്‍ ഫൈറ്റ് ഇന്ന് നിലനിൽക്കുന്നത് ഇവരുടെ ആരാധകര്‍ തമ്മിലാണ്. അതിനാല്‍ത്തന്നെ വലിയ ആവേശമാവും ആരാധകരില്‍ സൃഷ്ടിക്കുക.

വിജയ് നായകനാവുന്ന വരിശ് പൊങ്കല്‍ റിലീസ് ആയിരിക്കുമെന്ന് നിര്‍മ്മാതാക്കള്‍ നേരത്തെ പ്രഖ്യാപിച്ചിരുന്നതാണ്. ഇന്ന് അജിത്ത് ചിത്രം തുനിവിന്‍റെ റിലീസും ഔദ്യോഗികമായി പ്രഖ്യാപിച്ചതോടെയാണ് ഒരു ബോക്സ് ഓഫീസ് യുദ്ധം ഉറപ്പായത്. തുനിവിന്‍റെ നിര്‍മ്മാതാവ് ബോണി കപൂര്‍ ആണ് ഇക്കാര്യം പ്രഖ്യാപിച്ചത്. ഒപ്പം ചിത്രത്തിന്‍റെ തമിഴ്നാട് വിതരണാവകാശം ഉദയനിധി സ്റ്റാലിന്‍റെ റെഡ് ജയന്‍റ് മൂവീസ് സ്വന്തമാക്കിയ വിവരവും അദ്ദേഹം അറിയിച്ചിട്ടുണ്ട്.

നേര്‍കൊണ്ട പാര്‍വൈ, വലിമൈ എന്നീ ചിത്രങ്ങള്‍ക്കു ശേഷം സംവിധായാകൻ എച്ച് വിനോദും അജിത്ത് കുമാറും വീണ്ടും ഒന്നിക്കുന്ന ചിത്രമാണ് തുനിവ്. മഞ്ജു വാര്യരാണ് അജിത്തിന്‍റെ നായികയായി എത്തുന്നത് എന്നത് മലയാളി പ്രേക്ഷകരിലുംപ്രതീക്ഷ സൃഷ്ടിച്ചിട്ടുള്ള ഘടകമാണ്. വീര, സമുദ്രക്കനി, ജോണ്‍ കൊക്കെൻ, തെലുങ്ക് നടൻ അജയ് എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നുണ്ട്.

നീരവ് ഷാ ഛായാഗ്രഹണവും വിജയ് വേലുക്കുട്ടി എഡിറ്റിംഗും നിര്‍വ്വഹിക്കുന്നു. 2014 ല്‍ ആണ് ഇതിനുമുന്‍പ് വിജയ്, അജിത്ത് ചിത്രങ്ങള്‍ ഒരേ സമയം തിയറ്ററുകളില്‍ എത്തിയത്. ജില്ലയും വീരവുമായിരുന്നു അന്നത്തെ ചിത്രങ്ങള്‍.

Top