ആരാധകര്‍ ആവേശ പൂര്‍വ്വം കാത്തിരിക്കുന്ന ധനുഷ് ചിത്രം മാരി 2 വില്‍ വില്ലത്തിയായി വരലക്ഷ്മി ശരത്കുമാര്‍ എത്തുന്നു. ചിത്രത്തില്‍ ഒരു നിര്‍ണായക കഥാപാത്രമായായിരിക്കും വരലക്ഷ്മി എത്തുന്നതെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു.
ബാലാജി മോഹന്‍ സംവിധാനം ചെയ്യുന്ന മാരി2 വില്‍ സായി പല്ലവിയാണ് നായികയായി എത്തുന്നത്. നടന്‍ പ്രസന്നയും ഒരു ശക്തമായ കഥാപാത്രമായി മാരി 2ല്‍ ഉണ്ടാകും. ധനുഷ് തന്നെ നിര്‍മ്മിക്കുന്ന ചിത്രത്തില്‍ വില്ലന്‍ വേഷം ചെയ്യുന്നത് ടൊവിനോ തോമസ് ആണ്. ആദ്യ ഭാഗത്തില്‍ വില്ലനായി അഭിനയിച്ചത് വിജയ് യേശുദാസ് ആയിരുന്നു.
മഡോണ സെബാസ്റ്റ്യനും ചിത്രത്തില്‍ ഉണ്ടാകുമെന്ന തരത്തില്‍ സൂചനകള്‍ ഉണ്ട്. യുവന്‍ശങ്കര്‍ രാജയാണ് മാരി2വിനായി ഗാനങ്ങള്‍ ഒരുക്കുന്നതെന്ന് സംവിധായകന്‍ ബാലാജി മോഹന്‍ സ്ഥിരീകരിച്ചു. സിനിമയുടെ ചിത്രീകരണം ജനുവരിയില്‍ ആരംഭിക്കും.
