വാഷിങ്ടൺ ഡിസി: മെക്സിക്കോ അതിർത്തിയിൽ മതിൽ പണിയുമെന്ന് ആവർത്തിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. രാജ്യത്തെ ഒരു പൗരന്റെ ജീവൻകൂടി അനധികൃത കുടിയേറ്റക്കാർ മൂലം ഇല്ലാതാകരുതെന്നും അതിന് മതിൽ ആവശ്യമാണെന്നും ട്രംപ് പറഞ്ഞു. രാജ്യത്തെ അഭിസംബോധന ചെയ്ത് നടത്തിയ വാർഷിക പ്രസംഗത്തിലാണ് മതിൽ പണിയുമെന്ന് ട്രംപ് ആവർത്തിച്ചത്.
‘ജനപ്രതിനിധി സഭയിൽ പലരും നേരത്തെ അതിർത്തി മതിലിനെ പിന്തുണച്ചിരുന്നു. അന്നത് നടപ്പിലായിട്ടില്ല. ഇപ്പോൾ താൻ അത് പൂർത്തിയാക്കിത്തരാമെന്നും ട്രംപ് പറഞ്ഞു. മതിലിനു ഫണ്ട് കണ്ടെത്തുന്ന കാര്യത്തിൽ ഫെബ്രുവരി 15ന് മുൻപ് ഡെമോക്രാറ്റുകളും റിപ്പബ്ലിക്കൻസും തീരുമാനത്തിലെത്തണമെന്നും ട്രംപ് പറഞ്ഞു.
അതിർത്തി മതിൽ പണിയുന്നത് അനധികൃത കുടിയേറ്റവും മയക്കുമരുന്ന് കള്ളക്കടത്ത് തടയുന്നതിനും അത്യന്താപേക്ഷിതമാണെന്നും രാജ്യം നേടിരുന്ന ഗുരുതര പ്രതിസന്ധിയാണ് അനധികൃത കുടിയേറ്റമെന്നുമാണ് ട്രംപിന്റെ വാദം.
മെക്സിക്കൻ മതിലിന്റെ പേരിലാണ് അടുത്തിടെ അമേരിക്ക ദിവസങ്ങൾ നീണ്ട ഭരണ പ്രതിസന്ധി നേരിട്ടത്.
മതിലിന് ഫണ്ട് അനുവദിക്കണമെന്ന ആവശ്യം അവസാനിപ്പിച്ച ശേഷമാണ് ഭരണസ്തംഭനം നീങ്ങിയത്.
