മുംബൈ: യു എസ് തൊഴിൽ റിപ്പോർട്ട് പുറത്തുവന്നതോടെ ഫെഡറൽ റിസർവ് നിരക്ക് വർദ്ധന തുടരാൻ സാധ്യതയുണ്ടെന്ന ആശങ്ക ഉയർന്നതോടെ ഇന്ത്യൻ ഓഹരികൾ ഇടിഞ്ഞു. അദാനി ഗ്രൂപ്പ് ഓഹരികളിൽ നടന്നുകൊണ്ടിരിക്കുന്ന വിൽപ്പന സമ്മർദ്ദം ആഭ്യന്തര ഓഹരി വിപണിയെ കൂടുതൽ തളർത്തി.ബിഎസ്ഇ സെൻസെക്‌സ് 335 പോയിന്റ് അഥവാ 0.55 ശതമാനം താഴ്ന്ന് 60,507 ലെവലിലും നിഫ്റ്റി 50 89 പോയിന്റ് അല്ലെങ്കിൽ 0.5 ശതമാനം നഷ്ടത്തിൽ 17,765 ലും വ്യാപാരം അവസാനിപ്പിച്ചു.
നിഫ്റ്റിയിൽ 50 ഓഹരിയിൽ 39 എണ്ണവും ഇടിഞ്ഞു, അദാനി എന്റർപ്രൈസസ് ആണ് ഏറ്റവും കൂടുതൽ ഇടിഞ്ഞത്, അതേസമയം ഐടിസിയും സ്റ്റേറ്റ് ബാങ്ക് ഓഫ് ഇന്ത്യയും മൂന്നാം പാദത്തിൽ അറ്റാദായത്തിൽ പ്രതീക്ഷിച്ചതിലും മികച്ച വർദ്ധനവ് റിപ്പോർട്ട് ചെയ്തതിന് ശേഷം മുന്നേറി. ഇന്ത്യൻ ഇൻഫർമേഷൻ ടെക്നോളജി സ്റ്റോക്കുകൾ 1.1 ശതമാനത്തിലധികം ഇടിഞ്ഞു, യുഎസിലെ നിരക്ക് വർദ്ധന ആശങ്കകൾ കാരണമാണ് ഐടി ഓഹരികൾ ഏറ്റവും കൂടുതൽ നഷ്ടം നേരിട്ടത്.
ദിവിസ് ലാബ്‌സ്, ജെഎസ്‌ഡബ്ല്യു സ്റ്റീൽ, ഹിൻഡാൽകോ, ടാറ്റ സ്റ്റീൽ, കൊട്ടക് ബാങ്ക്, ഐഷർ മോട്ടോഴ്‌സ്, ഇൻഫോസിസ്, അദാനി എന്റർപ്രൈസസ്, എച്ച്‌ഡിഎഫ്‌സി ലൈഫ്, ഐസിഐസിഐ ബാങ്ക്, എം ആൻഡ് എം, അൾട്രാടെക് സിമന്റ്, ടാറ്റ മോട്ടോഴ്‌സ്, ആർ‌ഐ‌എൽ എന്നിവയാണ് നാഷണൽ സ്റ്റോക്ക് എക്സ്ചേഞ്ചിൽ പിന്നാക്കം നിൽക്കുന്നത്. നേരെമറിച്ച്, അദാനി പോർട്ട്സ്, ഇൻഡസ്ഇൻഡ് ബാങ്ക്, ബിപിസിഎൽ, പവർ ഗ്രിഡ്, സിപ്ല, ഐടിസി, ഹീറോ മോട്ടോകോർപ്പ്, ബജാജ് ഫിനാൻസ്, അപ്പോളോ ഹോസ്പിറ്റൽസ് എന്നിവ ഒരു ശതമാനത്തിനും 8.45 ശതമാനത്തിനും ഇടയിൽ മുന്നേറി. അതേസമയം, ബിഎസ്ഇ മിഡ്‌ക്യാപ്, സ്‌മോൾ ക്യാപ് സൂചികകൾ യഥാക്രമം 0.75 ശതമാനവും 0.49 ശതമാനവും മുന്നേറി.
