കൊച്ചി: കോണ്‍ഗ്രസ് പ്രവര്‍ത്തകര്‍ക്കെതിരായ തീവ്രവാദ പരാമര്‍ശത്തില്‍ രണ്ട് എസ്‌ഐമാര്‍ക്ക് സസ്‌പെന്‍ഷന്‍. ആലുവ എസ്‌ഐ ആര്‍.വിനോദിനും ഗ്രേഡ് എസ്‌ഐ രാജേഷിനുമാണ് സസ്‌പെന്‍ഷന്‍. ആലുവയില്‍ മോഫിയ പര്‍വീണിന്റെ മരണത്തില്‍ സമരം ചെയ്തവര്‍ക്കെതിരെയാണ് പരാമര്‍ശം ഉണ്ടായത്. മൂന്നു പേരുടെ റിമാന്‍ഡ് റിപ്പോര്‍ട്ടിലാണ് പരാമര്‍ശം ഉള്‍പ്പെടുത്തിയത്.
മോഫിയയുടെ ആത്മഹത്യാക്കുറിപ്പില്‍ പേര് പരാമര്‍ശിക്കപ്പെട്ട സിഐക്കെതിരെ നടപടി ആവശ്യപ്പെട്ടാണ് കോണ്‍ഗ്രസ് പ്രവര്‍ത്തകര്‍ സമരം നടത്തിയത്. എംപിമാരും എംഎല്‍എമാരും പങ്കെടുത്ത നിരന്തര സമരത്തിനൊടുവില്‍ ആരോപണവിധേയനായ സിഐയെ സസ്‌പെന്‍ഡ് ചെയ്തു.
എന്നാല്‍, സമരത്തിനെതിരെ റജിസ്റ്റര്‍ ചെയ്ത കേസില്‍ ഗുരുതര ആരോപണങ്ങളാണ് പൊലീസ് ഉന്നയിച്ചത്. ജലപീരങ്കിയായ വാഹനത്തിന്റെ മുകളില്‍ കയറി ചിത്രങ്ങള്‍ പകര്‍ത്തിയെന്നും ഇത് പ്രചരിപ്പിച്ചത് തീവ്രവാദ ബന്ധത്തിന്റെ പേരിലാണോ എന്ന് അന്വേഷിക്കണമെന്നുമാണ് പൊലീസിന്റെ വാദം.
