ബെംഗളൂരു : ഇലക്ട്രിക് വാഹന രംഗത്തേക്ക് പ്രമുഖ വാഹന നിർമ്മാതാക്കൾ എല്ലാവരും ചുവടുമാറ്റുകയാണ് ഇപ്പോൾ.
ടിവിഎസും ഇലക്ട്രിക് വാഹന രംഗത്തേക്ക് ചുവടുമാറ്റിയിരുന്നു.
ബെംഗളൂരുവിലെ ഇലക്ട്രിക് ഇരുചക്ര വാഹന – ഊര്‍ജ സ്റ്റാര്‍ട്ടപ്പായ അള്‍ട്രാവയലറ്റ് ഓട്ടോമോട്ടീവ് ലിമിറ്റഡിന്‍റെ 14.78 ശതമാനം ഓഹരി വാങ്ങി കൊണ്ടാണ് ടിവിഎസ് ഇലക്ട്രിക് രംഗത്തേയ്ക്ക് എത്തിയത്.
അള്‍ട്രാവയലറ്റ് ഓട്ടോമോട്ടീവ് ലിമിറ്റഡുമായി അഞ്ചു കോടി രൂപയുടെ ഇടപാടാണ് നടത്തിയതെന്ന് ടിവിഎസ് സ്റ്റോക്ക് എക്സ്ചേഞ്ച് വ്യക്തമാക്കി.
ബംഗളൂരു ബിഎംഎസ് കോളജ് ഓഫ് എന്‍ജിനിയറിംഗിലെ പൂര്‍വവിദ്യാര്‍ഥികളായ നീരജ് രാജ്മോഹനും നാരായണ്‍ സുബ്രഹ്മണ്യവും ചേര്‍ന്ന് 2015 ഡിസംബറിലാണ് അള്‍ട്രാ വയലറ്റ് എന്ന സ്റ്റാര്‍ട്ടപ് കമ്പനി ആരംഭിച്ചത്.
2016-17 സാമ്പത്തികവര്‍ഷം 3.21 ലക്ഷം രൂപയാണ് അള്‍ട്രാവയലറ്റിന്‍റെ വരുമാനം. നിലവിൽ മൂന്നു മോഡലുകള്‍ പരീക്ഷണാടിസ്ഥാനത്തില്‍ നിര്‍മ്മിച്ചെങ്കിലും നിരത്തിൽ അവതരിപ്പിച്ചിട്ടില്ല.
