ന്യൂഡല്ഹി: രാജ്യത്തെ ടെലിവിഷന് ചാനലുകളിലെ പരിപാടികള് നിരീക്ഷിക്കാന് ശക്തമായ നടപടിയുമായി കേന്ദ്രം. ചാനലുകളെ നിരീക്ഷിക്കാന് കേന്ദ്ര സര്ക്കാര് നിയോഗിച്ച സമിതിക്ക് നിയമപരിക്ഷ നല്കി ഉത്തരവിട്ടു. ടി.വി പരിപാടികള് ചട്ടം ലംഘിച്ചാല് സംപ്രേഷണം നിറുത്തിവയ്ക്കാന് സര്ക്കാര് ഇടപെടും.
ചാനലുകളുടെ സ്വയം നിയന്ത്രണ സംവിധാനങ്ങള്ക്കും നിയമപരമായ രജിസ്ട്രേഷന് നല്കും. ടി.വി ചാനലുകളുടെ നിയന്ത്രണത്തിന് നിരീക്ഷണത്തിനും ഇപ്പോള് നിയമത്തിന്റെ അടിസ്ഥാനത്തിലുള്ള സംവിധാനമില്ല.
ടിവി ചാനലുകളുടെ പരിപാടിയില് പരാതി ഉള്ളവര്ക്ക് അതാത് ചാനലുകള്ക്ക് പരാതി എഴുതി നല്കാം. എന്നാല് പരിഹാരമായില്ലെങ്കില് മാധ്യമ കൂട്ടായ്മകളുടെ സ്വയം നിയന്ത്രണ സംവിധാനത്തെ സമീപിക്കാം. കേന്ദ്രസര്ക്കാരിന്റെ നിരീക്ഷണ സമിതിയാണ് മൂന്നാമത്തെ തട്ട്. സമിതി എപ്പോഴൊക്കെ ഇടപെടും എന്ന് വ്യക്തമായി ഉത്തരവില് പറയുന്നില്ല. എന്നാല് സമിതിക്ക് നിയമപരിക്ഷ നല്കും.
മാധ്യമങ്ങളുടെ സ്വയം നിയന്ത്രണ സമിതികളെയും നിയമപരമായി അംഗീകരിച്ച് രജിസ്ട്രേഷന് അനുവദിക്കും. ഏതെങ്കിലും ടിവി പരിപാടി ചട്ടത്തിന് അനുസരിച്ചല്ല എന്ന് ബോധ്യപ്പെട്ടാല് സംപ്രേഷണം നിര്ത്തിവയ്ക്കുമെന്നും ഉത്തരവില് പറയുന്നു. നിയന്ത്രണസംവിധാനം വേണമെന്ന സുപ്രീംകോടതിയുടെ നിരീക്ഷണത്തിന്റെ പശ്ചാത്തലത്തിലാണ് നടപടിയെന്നാണ് വാര്ത്താവിതരണമന്ത്രി പ്രകാശ് ജാവദേക്കര് വ്യക്തമാക്കിയത്.