തൃശൂര്: വീട്ടിലെക്കെത്താന് ഓട്ടോറിക്ഷയില് കയറിയ യുവതിയെ സംഘം ചേര്ന്ന് അപമാനിക്കാന് ശ്രമിച്ചു. ഒളരിയിലെ ബാറിന് സമീപത്ത് വെച്ചാണ് സംഭവം. യുവതിയുടെ പരാതിയില് രണ്ട് പേര്ക്കെതിരെ പൊലീസ് കേസെടുത്തു.
ഓട്ടോ ഡ്രൈവര് അഞ്ചേരി സ്വദേശി ചൂണ്ടയില് വീട്ടില് അജീഷ് (49), കണ്ടാലറിയാവുന്ന മറ്റൊരാള് എന്നിവര്ക്കെതിരെയാണ് കേസെടുത്തത്. ഓട്ടോ ഡ്രൈവര്ക്കെതിരെ മദ്യപിച്ച് വാഹനമോടിച്ചതിനും കേസുണ്ട്.
തമിഴ്നാട് സ്വദേശിനിയായ യുവതി എറണാകുളത്താണ് ജോലി ചെയ്യുന്നത്. തൃശൂര് സ്വദേശിയായ യുവാവുമായുള്ള വിവാഹം നിശ്ചയവും കഴിഞ്ഞിരുന്നു. ഇവിടേക്ക് പോകാനായാണ് യുവതി തൃശൂരെത്തിയത്.
ഓട്ടോയില് കയറിയ ആള് അപമാനിക്കാന് ശ്രമിക്കുകയായിരുന്നുവെന്നാണ് പരാതി. യുവതിയുടെ നിലവിളി കേട്ട് ഓടിയെത്തിയവരാണ് രക്ഷിച്ചത്. പിന്നീട് വിവരമറിയിച്ചതനുസരിച്ച് വിവാഹം ഉറപ്പിച്ച യുവാവും സഹോദരിയുമെത്തി യുവതിയെ കൂട്ടിക്കൊണ്ടു പോയി. ഇതിനിടെ ഓട്ടോ ഡ്രൈവറും അപമാനിക്കാന് ശ്രമിച്ചയാളും രക്ഷപ്പെട്ടു.