തിരുവനന്തപുരം: എറണാകുളം-കോട്ടയം സെക്ഷനില്‍ ട്രാക്ക് അറ്റകുറ്റപ്പണികള്‍ നടക്കുന്നതിനാല്‍ ശനിയാഴ്ച കോട്ടയം വഴിയുള്ള ട്രെയിന്‍ ഗതാഗതത്തിനു നിയന്ത്രണം ഏര്‍പ്പെടുത്തിയതായി റെയില്‍വേ അറിയിച്ചു. നിയന്ത്രണത്തിന്റെ ഭാഗമായി മൂന്നു ട്രെയിനുകള്‍ റദ്ദാക്കി. കോട്ടയം വഴി പോകുന്ന എറണാകുളം-കൊല്ലം-എറണാകുളം മെമു പാസഞ്ചര്‍, എറണാകുളം-കായംകുളം-എറണാകുളം പാസഞ്ചര്‍, ആലപ്പുഴ വഴി പോകുന്ന എറണാകുളം-കായംകുളം-എറണാകുളം പാസഞ്ചര്‍ എന്നീ ട്രെയിനുകളാണ് റദ്ദാക്കിയത്.
തിരുവനന്തപുരം-ഹൈദരാബാദ് ശബരി എക്‌സ്പ്രസ്, കണ്ണൂര്‍-തിരുവനന്തപുരം ജനശതാബ്ദി എക്‌സ്പ്രസ്, ന്യൂഡല്‍ഹി-തിരുവനന്തപുരം കേരള എക്‌സ്പ്രസ് എന്നീ ട്രെയിനുകള്‍ ആലപ്പുഴ വഴി തിരിച്ചു വിടും. ഈ ട്രെയിനുകള്‍ക്ക് ഹരിപ്പാട്, അമ്പലപ്പുഴ, ചേര്‍ത്തല സ്റ്റേഷനുകളില്‍ ഒരു മിനിറ്റും ആലപ്പുഴ, എറണാകുളം സ്റ്റേഷനുകളില്‍ രണ്ട് മിനിറ്റും സ്റ്റോപ്പ് അനുവദിച്ചതായും റെയില്‍വേ അറിയിച്ചു. ഇതിനു പുറമെ കന്യാകുമാരി-മുംബൈ ജയന്തി ജനത എക്‌സ്പ്രസ് കോട്ടയം സ്റ്റേഷനില്‍ ഒന്നേകാല്‍ മണിക്കൂര്‍ പിടിച്ചിടുമെന്നും റെയില്‍വേ അറിയിച്ചു.
