ന്യൂഡൽഹി: സിബിഎസ്ഇ പ്ലസ് ടൂ പരീക്ഷയിൽ മൂന്നാം തവണയും പരാജയപ്പെട്ടതിന്റെ മനോവിഷമത്തിൽ വിദ്യാർത്ഥിനി ആത്മഹത്യ ചെയ്തു. പരീക്ഷാഫലം പ്രഖ്യാപിച്ചതിന്റെ പിറ്റേ ദിവസം വിദ്യാർത്ഥിയും അമ്മയും പ്രീത് വിഹാറിലെ സിബിഎസ്ഇ ഓഫീസിൽ പരീക്ഷാഫലം അറിയാൻ പോയിരുന്നു. ഇവിടെ വെച്ചാണ് ഇത്തവണയും താൻ പരീക്ഷയിൽ തോറ്റ കാര്യം കുട്ടി അറിഞ്ഞതെന്ന് പൊലീസ് പറഞ്ഞു. വടക്കുകിഴക്കൻ ഡൽഹിയിൽ കഴിഞ്ഞ ദിവസമാണ് സംഭവം നടന്നത്.
‘ശരിക്കും എന്താണ് സംഭവിച്ചത് എന്ന് അറിയില്ല. പ്രീത് വിഹാറിലെ സിബിഎസ്ഇ ഓഫീസിൽ നിന്ന് പുറത്തിറങ്ങിയ അവൾ പറഞ്ഞത് പേപ്പർ റദ്ദാക്കിയെന്നാണ്. എന്നാൽ അവൾ വീണ്ടും പരീക്ഷയിൽ തോറ്റു എന്നാണ് ഞങ്ങൾക്ക് തോന്നിയത്. അക്കാര്യം ഞങ്ങളോട് തുറന്നു പറയാൻ ധൈര്യമില്ലാത്തതു കൊണ്ടാകാം അവൾ അങ്ങനെ പറഞ്ഞത്’ എന്ന് പെൺകുട്ടിയുടെ പിതാവ് പൊലീസിനോട് പറഞ്ഞു.
വീട്ടിൽ തിരിച്ചെത്തിയ പെൺകുട്ടി അച്ഛനും അമ്മയ്ക്കുമൊപ്പം ഇരുന്ന് ഭക്ഷണം കഴിച്ചു. അതിന് ശേഷം തന്റെ മുറിയിലേയ്ക്ക് പോയ മകൾ പിന്നീട് തിരികെ വരാത്തതിനാൻ സംശയം തോന്നിയ അമ്മ മുറിയിലേക്ക് നോക്കാൻ ചെല്ലുമ്പോൾ പൂട്ടിയിട്ട നിലയിലായിരുന്നു മുറി. തുടർന്ന് ജനാലയിലൂടെ നോക്കിയപ്പോൾ ഫാനിൽ തൂങ്ങിയ നിലയിൽ കുട്ടിയെ കാണുകയായിരുന്നു.
ഉടൻ തന്നെ വാതിൽ പൊളിച്ച് കുട്ടിയെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. 2017ലും 2018ലും പെൺകുട്ടി പരീക്ഷയിൽ പരാജയപ്പെട്ടിരുന്നതായി സഹോദരി പറഞ്ഞു. ഇംഗ്ലീഷ് മകൾക്ക് ബുദ്ധിമുട്ട് ആയിരുന്നുവെന്നും ട്യൂഷന് അയച്ചിരുന്നുവെങ്കിലും ആ വിഷയത്തിന് എന്നും മാർക്ക് കുറവായിരുന്നുവെന്നും പിതാവ് വ്യക്തമാക്കി. സംഭവത്തിൽ പൊലീസ് കേസ് എടുത്തിട്ടുണ്ട്.
