തിരുവനന്തപുരം: മോഷണക്കുറ്റം ആരോപിച്ച് അച്ഛനേയും മൂന്നാം ക്ലാസുകാരി മകളേയും പരസ്യ വിചാരണ ചെയ്ത ആറ്റിങ്ങല് പിങ്ക് പൊലീസിലെ ഉദ്യോഗസ്ഥയെ സ്ഥലം മാറ്റി. സിവില് പൊലീസ് ഓഫിസര് രജിതയെ ആണ് സ്ഥലം മാറ്റിയത്.
വെള്ളിയാഴ്ചയാണ് തോന്നയ്ക്കല് സ്വദേശി ജയചന്ദ്രനേയും മൂന്നാം ക്ലാസുകാരി മകളേയും രജിത പരസ്യമായി വിചാരണ ചെയ്തത്. തന്റെ മൊബൈല് ഫോണ് ജയചന്ദ്രന് മോഷ്ടിച്ചെടുത്ത് മകള്ക്ക് കൊടുത്തെന്ന് ആരോപിച്ചായിരുന്നു രജിത ഇവരെ ചോദ്യം ചെയ്തത്. സ്റ്റേഷനില് കൊണ്ടുപോയി അച്ഛന്റേയും മകളുടേയും ദേഹം പരിശോധന നടത്തുമെന്നും രജിത പറഞ്ഞിരുന്നു
ഫോണ് എടുത്തില്ലെന്ന് പറഞ്ഞിട്ടും രജിത പിന്മാറാന് തയാറായില്ല. ഒടുവില് ഒപ്പമുണ്ടായിരുന്ന മറ്റൊരു വനിത പൊലീസ് ഉദ്യോഗസ്ഥ പിങ്ക് പൊലീസ് വാഹനത്തിലുണ്ടായിരുന്ന രജിതയിടെ ബാഗ് പരിശോധിച്ചപ്പോള് സൈലന്റിലാക്കിയ നിലയില് മൊബൈല് ഫോണ് കണ്ടെത്തി. ഫോണ് സ്വന്തം ബാഗില് നിന്ന് കിട്ടിയ ശേഷവും രജിത അച്ഛനോടും മകളോടും മോശമായാണ് പെരുമാറിയത്.
വീഡിയോ സാമൂഹിക മാധ്യമങ്ങളില് പങ്കുവച്ചതോടെയാണ് വിവരം പുറത്തറിയുന്നത്. സംഭവത്തില് ബാലാവകാശ കമ്മിഷനും കേസെടുത്തിട്ടുണ്ട്. റൂറല് എസ്പി ഓഫീസിലേക്കാണ് ഇവരെ മാറ്റിയത്. സംഭവത്തെക്കുറിച്ചന്വേഷിച്ച ആറ്റിങ്ങള് ഡിവൈഎസ്പി റിപ്പോര്ട്ട് റൂറല് എസ് പി ക്ക് കൈമാറിയിട്ടുണ്ട്.