തിരുവനന്തപുരം: സംസ്ഥാനത്ത് സമ്പൂര്ണ ലോക്ഡൗണ് വേണമെന്ന് ആരോഗ്യ വിദഗ്ധര്. വൈകുന്തോറും കൊവിഡ് സ്ഥിതിഗതികള് അതീവ ഗുരുതരമാകുമെന്നാണ് മുന്നറിയിപ്പ്. ആദ്യ ഡോസ് വാക്സിന് ഭൂരിഭാഗം പേര്ക്കും ഉറപ്പാക്കണമെന്നും വിദഗ്ധര് ആവശ്യപ്പെടുന്നു.
ഐസിയുകളില് 1907 രോഗികള്, വെന്റിലേറ്ററുകളില് 672 പേര്. ഓക്സിജന് പിന്തുണ വേണ്ട രോഗികളുടെ എണ്ണം ഈ കണക്കിലുമൊക്കെ ഇരട്ടിയിലേറെയാണ്. സ്ഥിതി അതീവ ഗുരുതരമാവുകയാണെന്ന് ആരോഗ്യ വിദഗ്ധര് തന്നെ വിദഗ്ധ സമിതിയേയും സര്ക്കാര് വൃത്തങ്ങളേയും നേരിട്ടറിയിച്ചിട്ടണ്ട്.
നാലാം തിയതി മുതല് 9-ാം തിയതി വരെയുള്ള കര്ശന നിയന്ത്രങ്ങള് മാത്രമല്ല ഒരു സമ്പൂര്ണ അടച്ചിടല് ഏറ്റവും കുറഞ്ഞത് രണ്ടാഴ്ചയെങ്കിലും വേണമെന്നാണ് ആവശ്യം. ഇപ്പോള് ചെയ്തില്ലെങ്കില് പിന്നെ ചെയ്തിട്ട് കാര്യമില്ലെന്ന മുന്നറിയിപ്പുമുണ്ട്. രണ്ടാം ഡോസ് വാക്സിന് മുന്ഗണന നല്കുന്നതിന് പകരം ആദ്യ ഡോസ് കൂടുതല് പേരില് എത്തിക്കാനുളള നടപടികള് വേണമെന്നാണ് മറ്റൊരു ആവശ്യം.