ഐക്കണിക്ക് ഇരുചക്ര വാഹന ബ്രാൻഡായ റോയൽ എൻഫീൽഡ് പുതിയ തലമുറ ബുള്ളറ്റ് 350 ഓഗസ്റ്റ് 30 ന് ഇന്ത്യൻ വിപണിയിൽ അവതരിപ്പിക്കാൻ ഒരുങ്ങുകയാണ്. പുതിയ തലമുറ ബുള്ളറ്റിന്റെ നിരവധി ടെസ്റ്റ് പതിപ്പുകള്‍ ഇതിനകം നിരവധി തവണ റോഡുകളിൽ കണ്ടെത്തിയിട്ടുണ്ട്. ക്ലാസിക് 350 , ഹണ്ടർ 350 , മെറ്റിയർ 350 എന്നിവയിൽ ഇതിനകം ഉപയോഗിക്കുന്ന ജെ-പ്ലാറ്റ്‌ഫോമിനെ അടിസ്ഥാനമാക്കിയുള്ളതായിരിക്കും ഈ മോഡല്‍ എന്നാണ് റിപ്പോര്‍ട്ടുകള്‍.
ഏറ്റവും പുതിയ റിപ്പോര്‍ട്ട് അനുസരിച്ച് ബുള്ളറ്റ് പ്രേമികള്‍ ഏറെ പ്രതീക്ഷയോടെ കാത്തിരിക്കുന്ന 2023 റോയൽ എൻഫീൽഡ് ബുള്ളറ്റ് 350 ആഗസ്റ്റ് 30-ന് ഇന്ത്യയിൽ അരങ്ങേറ്റം കുറിക്കും. 350 സിസി എഞ്ചിനുകളുള്ള റോയൽ എൻഫീൽഡിന്റെ കോർ പ്ലാറ്റ്ഫോം നവീകരണത്തിന്റെ ഭാഗമാണ് ഈ പുതിയ തലമുറ മോട്ടോർസൈക്കിൾ. എയർ-ഓയിൽ കൂൾഡ് സിംഗിൾ-സിലിണ്ടർ മോട്ടോർ, ലോംഗ്-സ്ട്രോക്ക് എഞ്ചിൻ തന്നെയായിരിക്കും പുതിയ ബുള്ളറ്റ് 350-ന് കരുത്ത് പകരുന്നത്. പവറും ടോർക്കും യഥാക്രമം 19.9 bhp ഉം 27 Nm ഉം ആയിരിക്കും. ഡ്യൂട്ടിയിലുള്ള ഗിയർബോക്‌സ് 5 സ്പീഡ് യൂണിറ്റായിരിക്കും. അതേസമയം ബുള്ളറ്റിന്റെ സ്വഭാവസവിശേഷതകൾക്ക് അനുയോജ്യമായ രീതിയിൽ എഞ്ചിൻ റീട്യൂൺ ചെയ്യും. പുതിയ എഞ്ചിൻ അതിന്റെ കരുത്തിന്‍റെ കാര്യത്തില്‍ ഏറെ പേരുകേട്ടതാണ്. ഗിയർ മാറ്റത്തിന്റെ കാര്യത്തിലും റോയൽ എൻഫീൽഡ് വലിയ മെച്ചപ്പെടുത്തലുകൾ വരുത്തിയിട്ടുണ്ട്. 2023 ബുള്ളറ്റ് 350 ലിറ്ററിന് 38 കിലോമീറ്റർ മൈലേജ് നൽകുമെന്ന് പ്രതീക്ഷിക്കുന്നു.
ക്ലാസിക് 350 യുമായി പുതിയ ബുള്ളറ്റ് 350 ഷാസി പങ്കിടും. മുൻവശത്ത് ടെലിസ്‌കോപ്പിക് ഫോർക്കുകളും പിന്നിൽ ഇരട്ട ഗ്യാസ് ചാർജ്ഡ് ഷോക്ക് അബ്‌സോർബറുകളും ഇത് സസ്പെൻഡ് ചെയ്യും. മുന്നിൽ ഒരു ഡിസ്‌ക്കും പിന്നിൽ ഡ്രം ബ്രേക്കുമാണ് ബ്രേക്കിംഗ് ഡ്യൂട്ടി ചെയ്യുന്നത്. പിൻ ഡിസ്ക് ബ്രേക്കോടുകൂടിയ വേരിയന്റുകളും കമ്പനി വിൽക്കും. സിംഗിൾ പീസ് സീറ്റും സ്‌പോക്ക്ഡ് റിമ്മുകളുമായാണ് മോട്ടോർസൈക്കിൾ വരുന്നത്. ലൈറ്റിംഗ് ഘടകങ്ങളും ക്ലാസിക് 350-മായി പങ്കിടും. അനലോഗ് സ്‍പീഡോമീറ്ററും ഇന്ധന ഗേജിനുള്ള ചെറിയ ഡിജിറ്റൽ റീഡൗട്ടും ഉപയോഗിച്ച് ഇൻസ്ട്രുമെന്റ് ക്ലസ്റ്റർ വളരെ ലളിതമായിരിക്കും.
പുത്തൻ ബുള്ളറ്റിന്റെ വിലയെയും ബുള്ളറ്റ് പ്രേമികള്‍ കൌതുകത്തോടെ ഉറ്റുനോക്കുന്നുണ്ട്. 2023 ബുള്ളറ്റ് 350 ന്റെ എക്സ്-ഷോറൂം വില 1.95 ലക്ഷം രൂപയിൽ ആരംഭിക്കുമെന്നാണ് പ്രതീക്ഷിക്കുന്നത്. നിലവിൽ, ഹണ്ടർ 350ന്റെ എക്സ്-ഷോറൂം വില 1.50 ലക്ഷം രൂപയിൽ തുടങ്ങി 1.75 ലക്ഷം രൂപ വരെയാണ് . 1.93 ലക്ഷം രൂപ മുതൽ 2.25 ലക്ഷം രൂപ വരെ എക്സ്-ഷോറൂം വിലയുണ്ട് ക്ലാസിക്ക് 350ന്.
