കോഴിക്കോട്: ചേവായൂർ സ്റ്റേഷനിൽ നിന്ന് പ്രതി രക്ഷപ്പെട്ട സംഭവത്തിൽ രണ്ടു പോലീസുകാർക്ക് സസ്പെൻഷൻ. എഎസ്ഐ സജി, സിപിഒ ദിലീഷ് എന്നിവരെയാണ് സസ്പെൻഡ് ചെയ്തത്.
സ്‌പെഷ്യൽ ബ്രാഞ്ച് അസിസ്റ്റന്‍റ് കമ്മിഷണർ സമർപ്പിച്ച റിപ്പോർട്ടിൽ സ്റ്റേഷൻ ചുമതലയുള്ള പോലീസുകാർക്ക് വീഴ്ച സംഭവിച്ചെന്നും ജാഗ്രത കുറവുണ്ടായെന്നും വ്യക്തമാക്കിയിരുന്നു. ഇതിൻ പ്രകാരമാണ് നടപടിയെടുത്തത്.
വെള്ളിമാടുകുന്ന് ചിൽഡ്രൻസ് ഹോമിൽ നിന്ന് പെൺകുട്ടികൾ ഒളിച്ചോടിപ്പോയ സംഭവത്തിൽ അറസ്റ്റിലായ കൊടുങ്ങല്ലൂർ സ്വദേശി ഫെബിൻ റാഫി ആണ് കഴിഞ്ഞ ദിവസം പോലീസ് സ്റ്റേഷനിൽ നിന്ന് ഇറങ്ങിയോടിയത്.
വസ്ത്രം മാറി പുറത്തേക്ക് ഇറക്കുന്നതിനിടെ പോലീസ് സ്റ്റേഷന്‍റെ പുറകു വശം വഴിയാണ് ഫെബിൻ രക്ഷപ്പെട്ടത്. തുടർന്ന് നടത്തിയ അന്വേഷണത്തിൽ ലോകോളജ് പരിസരത്തു നിന്നുമാണ് ഇയാളെ പിടികൂടിയത്.
