ടെലികോം മേഖല വന്‍ പ്രതിസന്ധിയിലൂടെ കടന്നുപോവുന്ന റിപ്പോര്‍ട്ടുകളാണ് പുറത്തുവരുന്നത്. ഇന്ത്യന്‍ ടെലികോം വ്യവസായത്തിന്റെ വരുമാനത്തില്‍ 9 ശതമാനം വര്‍ധനയുണ്ടായെങ്കിലും എജിആര്‍ വന്നതോടെ മിക്ക കമ്പനികളും വന്‍ സാമ്പത്തിക പ്രതിസന്ധിയിലാണ്.
മൂന്നാം പാദത്തില്‍ മൂന്ന് കമ്പനികള്‍ നിരക്കുകള്‍ കൂട്ടിയതോടെ ടെലികോം വിപണിയിലെ വരുമാനം നേരിയ തോതില്‍ വര്‍ധിച്ചു. ടെലികോം വിപണിയുടെ മൊത്തം കടം ഏകദേശം 8 ലക്ഷം കോടി രൂപയാണെന്നാണ് റിപ്പോര്‍ട്ട്. ടെലികോം വിപണിയെ രക്ഷിക്കാന്‍ സര്‍ക്കാര്‍ ഇളവുകള്‍ പ്രഖ്യാപിച്ചില്ലെങ്കില്‍ പൂട്ടേണ്ടിവരുമെന്ന് ചില കമ്പനികള്‍ പ്രഖ്യാപിച്ചു.
വോഡഫോണ്‍ ഐഡിയ വന്‍ പ്രതിസന്ധിയിലൂടെയാണ് കടന്നുപോകുന്നത്. വരുമാന വളര്‍ച്ചയുടെ കാര്യത്തില്‍, മൂന്നാം പാദത്തില്‍ വോഡഫോണ്‍ ഐഡിയ 5 ശതമാനം വര്‍ധന രേഖപ്പെടുത്തിയപ്പോള്‍ ജിയോയും എയര്‍ടെലും താരതമ്യേന 10.3 ശതമാനവും 9.5 ശതമാനവും വളര്‍ച്ച നേടി. കാര്യമായ നേട്ടമുണ്ടാക്കിയിരിക്കുന്നത് ജിയോയാണ്.
രാജ്യത്തെ മുന്‍നിര ടെലികോം കമ്പനികളെ എല്ലാം കീഴടക്കി കഴിഞ്ഞ പാദത്തിലെ വരുമാനത്തിലും ജിയോ മുന്നിലെത്തി. ട്രായിയുടെ കണക്കുകള്‍ പ്രകാരം ജിയോയാണ് മുന്നില്‍ നില്‍ക്കുന്നത്.
