ടാറ്റ മോട്ടോഴ്സ് പുതിയ നെക്സോണ് ഇവി ഫെയ്സ്ലിഫ്റ്റിനെ രാജ്യത്ത് അവതരിപ്പിച്ചു. 14.74 ലക്ഷം രൂപ എക്സ് ഷോറൂം പ്രാരംഭ വിലയില്‍ ആണ് പുത്തന്‍ നെക്സോണ് ഇവിയുടെ അവതരണം. 19.94 ലക്ഷം രൂപ വരെയാണ് ടോപ്പ് വേരിയന്റിന്റെ എക്സ് ഷോറൂം വില. ഇന്ത്യയിലെ ഏറ്റവും കൂടുതല്‍ വിറ്റഴിക്കപ്പെടുന്ന ഇലക്ട്രിക് എസ്യുവിക്ക് പുതിയ രൂപകല്‍പ്പനയും നവീകരിച്ച ഇന്റീരിയറും പുതിയ ഇലക്ട്രിക് മോട്ടോറും ഉള്ള ഒരു സമഗ്രമായ അപ്ഡേറ്റ് ലഭിച്ചു. പരിഷ്‌ക്കരിച്ച ഡിസൈന്‍, പുതിയ സവിശേഷതകള്‍, നവീകരിച്ച പവര്‍ട്രെയിന്‍ എന്നിവയുള്‍പ്പെടെ നിരവധി അപ്ഡേറ്റുകളോടെയാണ് കാര്‍ വരുന്നത്. ഇതിനകം നെക്സോണ് ഇവിയുടെ 53,000 യൂണിറ്റുകള്‍ കമ്പനി വിറ്റഴിച്ചിട്ടുണ്ട്. ഫെയ്സ്ലിഫ്റ്റഡ് പതിപ്പ് അത് ഗണ്യമായി വര്‍ദ്ധിപ്പിക്കാന്‍ ലക്ഷ്യമിടുന്നു.
2023 ടാറ്റ നെക്സോണ് ഇവി ഫെയ്സ്ലിഫ്റ്റ് വിപുലമായ ഡിസൈന്‍ അപ്ഡേറ്റുകളും പുതിയ സവിശേഷതകളും ലഭിക്കുന്നു. മികച്ച ശ്രേണിയും പ്രകടനവും വാഗ്ദാനം ചെയ്യുന്ന ഗണ്യമായി മെച്ചപ്പെടുത്തിയ പവര്‍ട്രെയിനും ലഭിക്കുന്നു. ടാറ്റ കര്‍വ്വ് കണ്‍സെപ്റ്റില്‍ നിന്ന് അതിന്റെ ഡിസൈന്‍ പ്രചോദനം ഉള്‍ക്കൊള്ളുന്നു. ഫോസില്‍ ഇന്ധനത്തില്‍ പ്രവര്‍ത്തിക്കുന്ന മോഡലുമായി താരതമ്യപ്പെടുത്തുമ്പോള്‍ കാര്യമായ വ്യത്യാസത്തോടെയാണ് ഇവി വരുന്നത്.
ഇതിന് വ്യത്യസ്തമായ എയര്‍ ഡാമും പൂര്‍ണ്ണ വീതിയുള്ള എല്‍ഇഡി ലൈറ്റ് ബാറും ലഭിക്കുന്നു. ഇത് കാറിനെ അതിന്റെ ഐസിഇ മോഡലില്‍ നിന്ന് വ്യത്യസ്തമാക്കുന്നു. എംപവേര്‍ഡ് ഓക്‌സൈഡ്, പ്രിസ്‌റ്റൈന്‍ വൈറ്റ്, ഇന്റന്‍സി ടീല്‍, ഫ്‌ലേം റെഡ്, ഡേടോണ ഗ്രേ, ഫിയര്‍ലെസ് പര്‍പ്പിള്‍, ക്രിയേറ്റീവ് ഓഷ്യന്‍ എന്നിങ്ങനെ ഏഴ് വ്യത്യസ്ത ബാഹ്യ നിറഭാഗങ്ങള്‍ പുതിയ വാഹനം ഉള്‍ക്കൊള്ളുന്നു.
പവര്‍ട്രെയിനില്‍ കാര്യമായ മാറ്റങ്ങളോടെയാണ് വാഹനം വരുന്നത്. മുമ്പത്തെ മോട്ടോറിനേക്കാള്‍ 20 കിലോ ഭാരം കുറഞ്ഞ ഒരു പുതിയ ജെന്‍ 2 മോട്ടോറാണ് നല്‍കുന്നത്. ഒറ്റ ചാര്‍ജില്‍ 465 കിലോമീറ്റര്‍ റേഞ്ച് വരെ എത്തുമെന്ന് ടാറ്റ അവകാശപ്പെടുന്നു. ലോംഗ് റേഞ്ച് വേരിയന്റ് 143 bhp പീക്ക് പവറും 215 Nm പരമാവധി ടോര്‍ക്കും സൃഷ്ടിക്കുന്നു. ഫേസ്ലിഫ്റ്റ് ചെയ്ത മോഡലില്‍ ടോര്‍ക്ക് ഉല്‍പ്പാദനം കുറച്ചപ്പോള്‍ പവര്‍ ഔട്ട്പുട്ട് സൂക്ഷ്മമായി വര്‍ദ്ധിപ്പിച്ചു. 8.9 സെക്കന്‍ഡില്‍ 0-100 കിലോമീറ്റര്‍ വേഗത കൈവരിക്കാന്‍ ഇതിന് കഴിയും. സിറ്റി, ഇക്കോ, സ്‌പോര്‍ട്ട് എന്നിങ്ങനെ മൂന്ന് വ്യത്യസ്ത ഡ്രൈവിംഗ് മോഡുകള്‍ ഉണ്ട്.
ഇവി കൂടുതല്‍ എയറോഡൈനാമിക് ആയി മാറിയെന്ന് കമ്പനി അവകാശപ്പെടുന്നു. അതിന്റെ ഫലമായി മെച്ചപ്പെട്ട പ്രകടനം. ലോംഗ് റേഞ്ച് ഫേസ്ലിഫ്റ്റ് 40.5 kWh ബാറ്ററി പാക്ക് നിലനിര്‍ത്തുന്നു. റേഞ്ച് 437 കിലോമീറ്ററില്‍ നിന്ന് 465 കിലോമീറ്ററായി ഉയര്‍ന്നു. പുതിയ നെക്സോണ് ഇവിയുടെ ബാറ്ററിക്കും മോട്ടോറിനും എട്ട് വര്‍ഷം അല്ലെങ്കില്‍ 160,000 കിലോമീറ്റര്‍ വാറന്റി ടാറ്റ നല്‍കുന്നുവാഹനത്തിന്റെ മറ്റൊരു രസകരമായ സവിശേഷത, ഇത് V2L, V2V സാങ്കേതികവിദ്യകളോടെയാണ് വരുന്നത്. ഇത് കാറിനെ ഇലക്ട്രിക്കല്‍ വീട്ടുപകരണങ്ങള്‍ പവര്‍ ചെയ്യാനും മറ്റ് ഇലക്ട്രിക് വാഹനങ്ങള്‍ ചാര്‍ജ് ചെയ്യാനും അനുവദിക്കുന്നു.
എല്‍ഇഡി ഡെയ്ടൈം റണ്ണിംഗ് ലൈറ്റുകളാല്‍ പരിപൂര്‍ണ്ണമായ പുതിയ സ്പ്ലിറ്റ് എല്‍ഇഡി ഹെഡ്ലാമ്പ് സജ്ജീകരണത്തോടെയാണ് ഇലക്ട്രിക് എസ്യുവി വരുന്നത്. മുന്‍ഭാഗം മുഴുവന്‍ നവീകരിച്ചു. 16 ഇഞ്ച് അലോയ് വീലുകളിലാണ് ഇത് പ്രവര്‍ത്തിക്കുന്നത്. പ്രീ-ഫേസ്ലിഫ്റ്റ് പതിപ്പുമായി താരതമ്യപ്പെടുത്തുമ്പോള്‍, നെക്സോണ് ഇവിയുടെ പുതുക്കിയ പതിപ്പിന് വിന്‍ഡോ ലൈനിലെ നീല ആക്സന്റ് നഷ്ടപ്പെടുന്നു. പിന്‍ഭാഗത്ത്, പുതുക്കിയ ടെയില്‍ഗേറ്റിന്റെ വീതിയില്‍ വ്യാപിച്ചുകിടക്കുന്ന ഒരു എല്‍ഇഡി ലൈറ്റ് ബാര്‍ ലഭിക്കുന്നു, ഇരുവശത്തുമുള്ള പുതിയ ഡെല്‍റ്റ ആകൃതിയിലുള്ള എല്‍ഇഡി ടെയില്‍ ലാമ്പുകളിലേക്ക് ലയിക്കുന്നു, അതേസമയം കൂടുതല്‍ കോണീയ ബമ്പറും പുതിയ സംയോജിത റൂഫ് സ്പോയിലറും ഇതിന് ഒരു റേഞ്ച് റോവര്‍ ലുക്ക് നല്‍കുന്നു.
സുരക്ഷയ്ക്കായി നെക്സോണ് ഇവിക്ക് ഇപ്പോള്‍ ആറ് എയര്‍ബാഗുകളും ഇഎസ്സിയും സ്റ്റാന്‍ഡേര്‍ഡായി ലഭിക്കുന്നു. അതേസമയം ഫ്രണ്ട് ആന്‍ഡ് റിയര്‍ പാര്‍ക്കിംഗ് സെന്‍സറുകള്‍, ഇലക്ട്രോണിക് പാര്‍ക്കിംഗ് ബ്രേക്ക്, ഹില്‍ അസെന്റ് ആന്‍ഡ് ഡിസന്റ് കണ്‍ട്രോള്‍, റിയര്‍ ഡിസ്‌ക് ബ്രേക്കുകള്‍ എന്നിവ കൂടുതല്‍ സംരക്ഷണം നല്‍കുന്നു.
