പാലക്കാട്: തമിഴ്നാട്ടിൽ സമ്പൂർണ്ണ ലോക്ക് ഡൗൺ പ്രഖ്യാപിച്ച സാഹചര്യത്തിൽ കെ.എസ്.ആർ.ടി.സി കോയമ്പത്തൂർ, പൊള്ളാച്ചി സർവീസുകൾ ഇന്ന് നടത്തില്ല. വാളയാർ വരെ മാത്രമായിരിക്കും സർവീസ് ഉണ്ടായിരിക്കുക.
കോയമ്പത്തൂരിലും പൊള്ളാച്ചിയിലും ഉൾപ്പെടെ കൊവിഡ് രോഗികളുടെ എണ്ണം വർധിച്ചു വരുന്നതിനാൽ ഇന്ന് തമിഴ്നാട്ടിൽ സമ്പൂർണ ലോക്ഡൗൺ പ്രഖ്യാപിച്ചിരിക്കുകയാണ്. ഈ സാഹചര്യത്തിൽ വാളയാർ, ഗോപാലപുരം, വേലംതാവളം, ഗോവിന്ദാപുരം, നടുപ്പുണി ചെക്ക്പോസ്റ്റുകളിൽ പരിശോധന ശക്തമാക്കിയിട്ടുണ്ട്.
ഊടുവഴികളിലൂടെ വരുന്നവരെ പ്രത്യേകം നിരീക്ഷിക്കും. നിയന്ത്രണങ്ങൾ പാലിക്കാൻ കഴിയാത്തവരെ തിരിച്ചയ്ക്കും. ഞായറാഴ്ചകൾ ഒഴികെ മറ്റു ദിവസങ്ങളിൽ വിനോദസഞ്ചാരത്തിനും ക്ഷേത്രദർശനത്തിനും ഉൾപ്പെടെ തമിഴ്നാട്ടിലേക്ക് കടക്കുന്നവർ കൊവിഡ് മാനദണ്ഡങ്ങൾ കർശനമായി പാലിക്കണം.