ചെന്നൈ: പണം തട്ടാന് ഇറങ്ങിയ കള്ളന്മാരെ അടിച്ച് ഓടിച്ച വയോധിക ദമ്പതിമാര്ക്ക് സര്ക്കാരിന്റെ ധീരതാ പുരസ്കാരം. പിന്നിലൂടെ എത്തി വയോധികന്റെ കഴുത്തില് കുരുക്കിട്ട കള്ളനെ വയോധിക നേരിടുകയായിരുന്നു. ചെരുപ്പിനും കസേരയ്ക്കും അടിച്ചാണ് കള്ളനെ തുരത്തിയത്. സംഭവത്തിന്റെ ദൃശ്യങ്ങളും സമൂഹമാധ്യമങ്ങളില് വൈറലായി മാറിയിരുന്നു.
തിരുനെല്വേലി സ്വദേശികളായ 70കാരന് എസ് ഷണ്മുഖവേലും ഭാര്യ സെന്താമരയുമാണ് വീഡിയോയിലെ താരങ്ങള്. ഇപ്പോള് ആ ധീരതയ്ക്കാണ് സര്ക്കാരിന്റെ പ്രത്യേക പുരസ്കാരം ലഭ്യമായത്. മുഖംമൂടി ധരിച്ച് കൈയ്യില് വെട്ടുകത്തിയുമായെത്തിയ രണ്ടു കള്ളന്മാരെയാണ് ഷണ്മുഖവേലും സെന്താമരൈയും തുരത്തിയോടിച്ചത്.
വീട്ടില് സ്ഥാപിച്ചിരുന്ന സിസി ടിവിയില് പതിഞ്ഞ ദൃശ്യങ്ങളായിരുന്നു ഇവ. തിരുനെല്വേലി ജില്ലാ കളക്ടറുടെയും പോലീസ് സൂപ്രണ്ടിന്റെയും ശുപാര്ശ പ്രകാരമാണ് ഇരുവര്ക്കും പുരസ്കാരം ലഭിച്ചത്.