ചെന്നൈ : തമിഴ് ഹാസ്യ നടൻ ബാലാജി എന്ന വടിവേൽ ബാലാജി അന്തരിച്ചു . 45 വയസ്സായിരുന്നു. ചെന്നൈ രാജീവ്ഗാന്ധി ഗവ. ആശുപത്രിയിൽ ചികിൽസയിലിരിക്കെ ആണ് മരണം. രണ്ടാഴ്ച മുൻപ് ഉണ്ടായ ഹൃദയാഘാതത്തെ തുടർന്ന് കൈകളുടെ ചലനശേഷി നഷ്ടപ്പെട്ടതിനെ തുടർന്നാണ് ആശുപത്രിയിൽ ചികിത്സ തേടിയത്. വ്യാഴാഴ്ച രാവിലെ ആണ് മരണം സംഭവിച്ചത്.
മധുരയില്‍ ജനിച്ച വടിവേല്‍ ബാലാജി 1991ലാണ് ആദ്യമായി സിനിമയില്‍ എത്തിയത്. മിമിക്രി ആർട്ടിസ്റ്റായിരുന്നു. വിജയ് ടി.വിയിലെ ‘കലക്കപോവത് യാര്’ എന്ന ഷോയിലൂടെയാണ് ശ്രദ്ധിക്കപ്പെട്ടത്. എന്‍ രാസാവിന്‍ മനസിലെ ആയിരുന്നു ആദ്യ ചിത്രം. കോലമാവ് കോകില’ ഉൾപ്പെടെ ചില സിനിമകളിലും അഭിനയിച്ചു.
തമിഴ് ഹാസ്യനടൻ വടിവേലുവിനെ നന്നായി അനുകരിച്ചിരുന്നതിനാലാണ് വടിവേൽ ബാലാജി എന്ന പേര് ലഭിച്ചത്. ഇദ്ദേഹത്തിന്റെ അകാല വിയോഗത്തിൽ തമിഴ് സിനിമാലോകം ഞെട്ടലിലാണ്.
