മസാല ബോണ്ടിൽ വിദേശനാണ്യ വിനിമയ നിയമത്തിന്റെ (ഫെമ) ലംഘനമുണ്ടോയെന്ന അന്വേഷണത്തിനായി തോമസ് ഐസക്കിനും കിഫ്‌ബിക്കും ഇഡി വീണ്ടും സമൻസ്‌ അയച്ചത്‌ ചോദ്യംചെയ്‌തുള്ള ഹർജി ഹൈക്കോടതി ചൊവ്വാഴ്‌ച പരിഗണിക്കാൻ മാറ്റി.
തോമസ് ഐസക്കും കിഫ്‌ബിയും നൽകിയ ഹർജി ജസ്റ്റിസ്‌ ദേവൻ രാമചന്ദ്രനാണ്‌ പരിഗണിക്കുന്നത്‌. ഇഡി ഫയൽ ചെയ്‌ത എതിർസത്യവാങ്‌മൂലം ബെഞ്ചിൽ എത്തിയില്ലെന്ന്‌ ചൂണ്ടിക്കാട്ടിയാണ്‌ കേസ് മാറ്റിയത്‌. കിഫ്ബി നൽകിയ ഹർജി വെള്ളിയാഴ്‌ച പരിഗണിക്കാൻ മാറ്റി.
മസാല ബോണ്ടുമായി ബന്ധപ്പെട്ട അന്വേഷണത്തിൻ്റെ ഭാഗമായി ഇന്ന് ഹാജരാകാൻ ഡോ. തോമസ് ഐസകിന് ഇ ഡി നോട്ടീസ് നൽകിയിരുന്നു. ഈ നോട്ടീസ് ചോദ്യം ചെയ്താണ് ഡോ. തോമസ് ഐസക് ഹൈക്കോടതിയെ സമീപിച്ചത്.
ഇന്നലെ കേസ് പരിഗണിക്കവെ ഇ ഡി മുമ്പാകെ ഇന്ന് ഹാജരാകുന്ന കാര്യത്തിൽ തോമസ് ഐസക്കിന് സ്വയം തീരുമാനിക്കാമെന്ന് കോടതി വ്യക്തമാക്കിയിരുന്നു. ഹാജരാകാനും ഹാജരാകാതിരിക്കാനും തോമസ് ഐസക്കിന് സ്വാതന്ത്ര്യമുണ്ടെന്നാണ് കോടതി വ്യക്തമാക്കിയത്.
