വേനൽ മഴ എത്താത്തിനെ തുടർന്ന് പുതിയ പരീക്ഷണങ്ങൾക്ക് യു.എ.ഇ ഒരുങ്ങുന്നു. ഡ്രോണുകൾ ഉപയോഗിച്ചുള്ള ക്ലൗഡ് സീഡിങ് വഴി മഴയെത്തിക്കാനാണ് ആലോചന.
മഴമേഘങ്ങളിലേക്ക് പറന്നുകയറുന്ന ഡ്രോണുകൾ നൽകുന്ന ഇലക്ട്രിക്കൽ ചാർജ് വഴി മഴ പെയ്യിക്കാനുള്ള പദ്ധതിയുണ്ടെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. പരമ്പരാഗത ക്ലൗഡ് സീഡിങ് രീതിക്ക് പകരം മേഘങ്ങളിൽ രാസപദാർഥം ഉപയോഗിക്കുന്നതിന് ഡ്രോണുകളുടെ സഹായം തേടും. ഇതിന്റെ പ്രാഥമിക നടപടികൾ ദുബൈ സനദ് അക്കാദമിയിലാണ് നടത്തുന്നത്.
സാധാരണ ജനുവരി, ഫ്രെബ്രുവരി മാസങ്ങളിൽ യു.എ.ഇയിൽ മികച്ചതോതിൽ മഴ ലഭിക്കാറുണ്ട്. കഴിഞ്ഞ വർഷം ജനുവരിയിലുണ്ടായ കനത്ത മഴയിൽ ദുബൈ വിമാനത്താവളം അടക്കം വെള്ളത്തിലായിരുന്നു. എന്നാൽ, ഇക്കുറി ചിലയിടങ്ങളിൽ ഒറ്റപ്പെട്ട ചെറിയ മഴ ലഭിച്ചതല്ലാതെ കനത്ത മഴ എവിടെയും പെയ്തിരുന്നില്ല. യു.എ.ഇ വേനൽകാലത്തിലേക്ക് പ്രവേശിക്കുകയും ചൂട് വർധിക്കുകയും ചെയ്തിട്ടുണ്ട്.