തിരുവനന്തപുരം: കൊവിഡ് എന്ന മഹാമാരിക്ക് മുമ്പില് തളരാതെ ഇന്ന് മുതല് കേരളത്തിലെ കുട്ടികള് പാഠങ്ങളുരുവിടും. ഈ അധ്യായനവര്ഷവും സംസ്ഥാനത്തെ വിദ്യാര്ത്ഥികള് ചൊവ്വാഴ്ച മുതല് വീണ്ടും ഡിജിറ്റല് ക്ലാസിലെത്തും. കൊവിഡ് വ്യാപനത്തെ തുടര്ന്ന് ഇക്കൊല്ലവും ഓണ്ലെനിലൂടെയാണ് പഠനം നടക്കുക. കൂടാതെ 45 ലക്ഷത്തോളം കുട്ടികള് സ്കൂള് പ്രവേശനോത്സവത്തില് വീടുകളിലിരുന്ന് പങ്കാളികളാകും.
തിരുവനന്തപുരം കോട്ടണ്ഹില് ഗവ. സ്കൂളില് രാവിലെ 8.30ന് മുഖ്യമന്ത്രി പിണറായി വിജയന് സംസ്ഥാനതല പ്രവേശനോത്സവം ഉദ്ഘാടനം ചെയ്യും. വിദ്യാര്ഥികള് കലാപരിപാടികള് അവതരിപ്പിക്കും. പൊതുവിദ്യാഭ്യാസ മന്ത്രി വി ശിവന്കുട്ടി അധ്യക്ഷനാകും. വെര്ച്വലായി സ്ംഘടിപ്പിക്കുന്ന പ്രവേശനോത്സവത്തില് മമ്മൂട്ടി, മോഹന്ലാല്, പൃഥ്വിരാജ്, സുരാജ് വെഞ്ഞാറമൂട്, പി ടി ഉഷ തുടങ്ങിയവര് ആശംസയര്പ്പിക്കും.
ഉദ്ഘാടനസമ്മേളനം കൈറ്റ് വിക്ടേഴ്സ് ചാനല് വഴി തത്സമയം സംപ്രേഷണം ചെയ്യും. രാവിലെ 10.30ന് അങ്കണവാടി കുട്ടികള്ക്കുള്ള പുതിയ ‘കിളിക്കൊഞ്ചല് ക്ലാസുകള്’ ആരംഭിക്കും. പകല് 11 മുതല് യുഎന് ദുരന്ത നിവാരണ വിഭാഗത്തലവന് ഡോ. മുരളി തുമ്മാരുകുടി, മജീഷ്യന് ഗോപിനാഥ് മുതുകാട്, യൂണിസെഫ് സോഷ്യല് പോളിസി അഡ്വൈസര് ഡോ. പീയൂഷ് ആന്റണി തുടങ്ങിയവര് കുട്ടികളുമായി സംവദിക്കും.
പകല് രണ്ട് മുതല് മൂന്നുവരെ ചൈല്ഡ് സൈക്യാട്രിസ്റ്റ് ഡോ. ജയപ്രകാശ് കുട്ടികളുടെ ചോദ്യങ്ങള്ക്ക് മറുപടി നല്കും. കേരളത്തിലെ എല്ലാ സ്ക്കൂളുകളിലും വെര്ച്വലായി ജനപ്രതിനിധികളുടെ സാന്നിധ്യത്തിലാണ് പ്രവേശനോത്സവം സംഘടിപ്പിക്കുന്നത്.