അബുദാബി: കൊവിഡ് പിസിആര്‍ പരിശോധനയ്ക്ക് അമിത ചാര്‍ജ് ഈടാക്കുന്ന സ്ഥാപനങ്ങള്‍ക്കെതിരേ ശക്തമായ മുന്നറിയിപ്പുമായി അബൂദാബി ആരോഗ്യ വകുപ്പ്. നിലവില്‍ 65 ദിര്‍ഹമാണ് പിസിആര്‍ ടെസ്റ്റിനുള്ള ഫീസായി ആരോഗ്യ മന്ത്രാലയം നിശ്ചയിച്ചിരിക്കുന്നത്. ഇത് കര്‍ശനമായി പാലിക്കാന്‍ എല്ലാ ആരോഗ്യ കേന്ദ്രങ്ങളോടും അബൂദബി ആരോഗ്യ വകുപ്പ് നിര്‍ദേശിച്ചു.
പരിശോധനയ്ക്കുള്ള സ്രവം ശേഖരിക്കല്‍, പരിശോധന, ഫലം അടങ്ങിയ റിപ്പോര്‍ട്ട് നല്‍കല്‍ എന്നിവയ്ക്ക് ഉള്‍പ്പെടെയാണ് 65 ദിര്‍ഹം നിശ്ചയിച്ചിരിക്കുന്നത്. ഫലം ഉടന്‍ ലഭ്യമാക്കുന്നതും അത് സാധാരണ നിലയില്‍ നല്‍കുന്നതും തമ്മില്‍ ഈടാക്കുന്ന തുകയില്‍ വ്യത്യാസം പാടില്ലെന്നും അധികൃതര്‍ അറിയിച്ചു.
ഈ നിബന്ധന ലംഘിക്കുന്ന ലാബുകള്‍ക്കും സ്ഥാപനങ്ങള്‍ക്കും പിസിആര്‍ പരിശോധന നടത്താനുള്ള ലൈസന്‍സ് റദ്ദാക്കുകയും അതോടൊപ്പം സ്ഥാപനത്തില്‍ നിന്ന് പിഴ ഈടാക്കുകയും ചെയ്യുമെന്നും അബൂദാബി ആരോഗ്യവകുപ്പ് മുന്നറിയിപ്പ് നല്‍കി.
കൊവിഡ് ലക്ഷണങ്ങളൊന്നുമില്ലാത്തവര്‍ പരിശോധന നടത്തുമ്പോള്‍ അതിന്റെ ചെലവ് പരിശോധന നടത്തുന്ന വ്യക്തി സ്വയം വഹിക്കണം. അല്ലാത്തവരുടേത് സര്‍ക്കാര്‍ വഹിക്കുമെന്നും മന്ത്രാലയം അറിയിച്ചു. പിസിആര്‍ പരിശോധനയ്ക്ക് കൂടുതല്‍ നിരക്ക് ഈടാക്കുന്നത് ശ്രദ്ധയില്‍പ്പെട്ടാല്‍ 024193845 എന്ന നമ്പറിലോ Healthsystemfinancing@doh.gov.ae എന്ന ഇമെയില്‍ വിലാസത്തിലോ അറിയിക്കണമെന്ന് അധികൃതര്‍ അറിയിച്ചു.
