മുംബൈ: ഓഹരി വിപണിയില്‍ നേട്ടത്തോടെ തുടക്കം. സെന്‍സെക്‌സ് 150 പോയന്റ് നേട്ടത്തില്‍ 40,656ലെത്തി. നിഫ്റ്റി 12,000ന് മുകളിലുമാണ്.
മുടങ്ങിക്കിടക്കുന്ന ഭവന പദ്ധതികള്‍ക്ക് സര്‍ക്കാര്‍ 25,000 കോടി രൂപയുടെ പാക്കേജ് അനുവദിച്ചതാണ് വിപണിയെ സ്വാധീനിച്ചത്. ഇന്ത്യബുള്‍സ് റിയല്‍ എസ്റ്റേറ്റ് ലിമിറ്റഡ്, പ്രസ്റ്റീജ് എസ്റ്റേറ്റ്സ്, ഗോദ്റേജ് പ്രോപ്പര്‍ട്ടീസ്, ശോഭ ലിമിറ്റഡ്, തുടങ്ങിയ കമ്പനികളുടെ ഓഹരികള്‍ രണ്ടുശതമാനത്തിലേറെ നേട്ടമുണ്ടാക്കി.
ഹൗസിങ് ഫിനാന്‍സ് കമ്പനികളുടെ ഓഹരികളും നേട്ടത്തിലാണ്. പിഎന്‍ബി ഹൗസിങ് ഫിനാന്‍സ്, എല്‍ഐസി ഹൗസിങ് ഫിനാന്‍സ് എന്നീ ഓഹരികള്‍ യഥാക്രമം നാലും അഞ്ചും ശതമാനം നേട്ടത്തിലായി.
ആക്സിസ് ബാങ്ക്, ആര്‍ബിഎല്‍ ബാങ്ക്, എച്ച്ഡിഎഫ്സി ബാങ്ക്, ഇന്‍ഡസിന്റ് ബാങ്ക് തുടങ്ങിയവയാണ് നേട്ടത്തില്‍ മുന്നില്‍.യുഎസ്-ചൈന വ്യാപാരയുദ്ധം സംബന്ധിച്ച ആശങ്കകള്‍ക്ക് പരിഹാരമാകാത്തത് ഏഷന്‍ വിപണികളെ ബാധിച്ചു.
