തിരുവനന്തപുരം: വിവിധ തര്ക്കങ്ങളില്പ്പെട്ട് പ്രതിസന്ധിയില്പ്പെട്ട് കിടക്കുന്ന പള്ളികളും സെമിത്തേരികളും സംസ്ഥാന സര്ക്കാര് ഏറ്റെടുക്കണമെന്ന ദേശീയ ന്യൂനപക്ഷ കമ്മീഷന്റെ നിര്ദ്ദേശത്തില് അതൃപ്തി അറിയിച്ച് ബിജെപി സംസ്ഥാന ഘടകം. കമ്മീഷന്റെ നിര്ദ്ദേശം ഒഴിവാക്കേണ്ടതായിരുന്നുവെന്നും ഇങ്ങനെ ഏറ്റെടുക്കുന്നത് പുതിയ കീഴ്വഴക്കങ്ങള് സൃഷ്ടിക്കുമെന്നും ബിജെപി സംസ്ഥാന ഘടകം പറയുന്നു.
വിഷയത്തില് ദേശീയ ന്യൂനപക്ഷ കമ്മീഷന് വൈസ് ചെയര്പേഴ്സണ് ജോര്ജ് കുര്യനെ ബിജെപി സംസ്ഥാന അധ്യക്ഷന് പി.എസ്. ശ്രീധരന് പിള്ള അതൃപ്തി അറിയിച്ചിട്ടുണ്ട്. മറ്റ് മതസ്ഥാപനങ്ങള് ഏറ്റെടുക്കാന് കമ്മീഷന്റെ നിര്ദ്ദേശം ഇടയാക്കുമെന്ന് പി.എസ് ശ്രീധരന് പിള്ള പറയുന്നു.
കഴിഞ്ഞ ദിവസമാണ് സഭാതര്ക്കത്തെ തുടര്ന്ന് മൃതദേഹം വെച്ചുകൊണ്ടുള്ള വിലപേശല് അവസാനിപ്പിക്കുന്നതിന് വേണ്ടി സെമിത്തേരിയും പള്ളിയും സംസ്ഥാന സര്ക്കാര് ഏറ്റെടുക്കണമെന്ന് കേന്ദ്ര ന്യൂനപക്ഷ കമ്മീഷന് നിര്ദ്ദേശിച്ചത്. എന്നാല് സെമിത്തേരിയും പള്ളിയും സര്ക്കാര് ഏറ്റെടുക്കുന്നതിന് പകരം മറ്റ് മാര്ഗങ്ങളിലൂടെ പരിഹാരം കാണണമെന്നാണ് ബിജെപിയുടെ നിലപാടെന്നും ശ്രീധരന് പിള്ള ജോര്ജ് കുര്യനെ അറിയിച്ചു. ഡല്ഹിയില്വെച്ചാണ് ഇരുവരും കൂടിക്കാഴ്ചനടത്തിയത്.