ദുബായ് : നടി ശ്രീദേവിയുടെ മരണം ബാത്ത് ടബ്ബിലെ വെള്ളത്തില് മുങ്ങിയാണെന്ന് ഫോറന്സിക് റിപ്പോര്ട്ട്. മരണത്തില് ദുരൂഹതയില്ലെന്ന് നേരത്തെ റിപ്പോര്ട്ട് വന്നിരുന്നു. എന്നാല് നടിയുടേത് അപകടമരണമാണെന്നാണ് ഫോറന്സിക് റിപ്പോര്ട്ടില് പറയുന്നത്. ശ്രീദേവിയുടെ രക്തത്തില് മദ്യത്തിന്റെ അംശം കണ്ടെത്തിയിട്ടുണ്ട്.
ബോധരഹിതയായി കുളിമുറിയിലെ ബാത്ത് ടബ്ബില് വീണ് ശ്വാസകോശത്തില് വെള്ളം കയറി ശ്രീദേവി മരിച്ചതെന്നാണ് റിപ്പോര്ട്ടില് പറയുന്നത്.
പോസ്റ്റ്മോര്ട്ടത്തില് അസ്വാഭികമായി ഒന്നും കണ്ടെത്തിയിട്ടില്ല. ശരീരത്തില് മുറിവുകളോ ചതവുകളോ ഇല്ലെന്നും പരിശോധനയില് വ്യക്തമായി. അസ്വാഭാവിക മരണം എന്ന നിലയ്ക്കാണ് ദുബായ് പോലീസ് മൃതദേഹം വിശദമായി പരിശോധിക്കാന് തീരുമാനിച്ചത്.
അപകട മരണമാണെന്ന് വ്യക്തമായതോടെ ദുബായ് പോലീസ് ശ്രീദേവിയുടെ പാസ്പോര്ട്ട് റദ്ദാക്കി മരണ സര്ട്ടിഫിക്കറ്റ് നല്കാനുള്ള നടപടി തുടങ്ങി. മരണവുമായി ബന്ധപ്പെട്ട് ദുരൂഹതകള് നിലനില്ക്കുന്നതിനാല് മൃതദേഹം നാട്ടിലേക്ക് കൊണ്ടുവരുന്നത് വൈകുമെന്നാണ് റിപ്പോര്ട്ട്. ബാത്ത് ടബ്ബില് മുങ്ങിമരിച്ചതാണെന്ന പോസ്റ്റ് മോര്ട്ടം റിപ്പോര്ട്ട് പുറത്തുവന്നതോടെ പബ്ലിക് പ്രോസിക്യൂട്ടറുടെ അനുമതിയോടെ മാത്രമേ ഇനി മൃതദേഹം നാട്ടിലേക്ക് കൊണ്ടുവരാനാകൂ. ഇതിനുള്ള നടപടിക്രമങ്ങള് വൈകുമെന്നതിനാല് ഇന്ന് നാട്ടിലേക്ക് മൃതദേഹം കൊണ്ടുവരാന് സാദ്ധ്യതയില്ല.
ശനിയാഴ്ച രാത്രിയാണ് ദുബൈയിലെ ജുമെയ്റ എമിറേറ്റ്സ് ടവര് ഹോട്ടലില് വച്ച് ഹൃദയസ്തംഭനത്തെ തുടര്ന്ന് ശ്രീദേവി അന്തരിച്ചത്.
ശ്രീദേവിയുടെ കുടുംബത്തോട് അടുത്ത വൃത്തങ്ങളെ ഉദ്ധരിച്ചു കൊണ്ടുള്ള ഖലീജ് ടൈംസിന്റെ റിപ്പോര്ട്ട് പ്രകാരം, അത്താഴവിരുന്നിന് പോകാനുള്ള ഒരുക്കത്തിലായിരുന്നു മരണത്തിന്റെ തൊട്ടുമുമ്പുള്ള നിമിഷങ്ങളില് ശ്രീദേവിയും ഭര്ത്താവും.
ശ്രീദേവിക്ക് സര്പ്രൈസ് ഡിന്നര് നല്കാനാണ് മുംബൈയില്നിന്ന് ബോണി കപൂര് വീണ്ടും ദുബൈയിലേക്ക് തിരികെയെത്തിയത്. വൈകുന്നേരം 5.30( ദുബായ് സമയം )ഓടെയാണ് ബോണി കപൂര് ജുമെയ്റ എമിറേറ്റ്സ് ടവര് ഹോട്ടലില് ശ്രീദേവി താമസിച്ചിരുന്ന മുറിയില് എത്തിയത്. ശേഷം ഉറങ്ങുകയായിരുന്ന ശ്രീദേവിയെ വിളിച്ചുണര്ത്തി.
തുടര്ന്ന് അത്താഴത്തിന് ക്ഷണിക്കുകയും 15 മിനുട്ടോളം ഇരുവരും സംസാരിച്ചിരിക്കുകയും ചെയ്തു. പിന്നീട് ശ്രീദേവി ശുചിമുറിയിലേക്ക് പോയി. 15 മിനിറ്റിന് ശേഷവും ശ്രീദേവി പുറത്തുവരാത്തതിനെ തുടര്ന്ന് ബോണി വാതിലില് തട്ടി. എന്നാല് അകത്തുനിന്ന് മറുപടി ലഭിക്കാത്തതോടെ ബോണി വാതില് ബലം പ്രയോഗിച്ച് തുറക്കുകയായിരുന്നു.
ബാത് ടബ്ബിലെ വെള്ളത്തില് ചലനമറ്റ് മുങ്ങിക്കിടക്കുന്ന നിലയിലാണ് ശ്രീദേവിയെ അവിടെ കാണാനായത്. തട്ടിവിളിച്ചു നോക്കിയെങ്കിലും പ്രതികരണമുണ്ടാകാത്തതിനെ തുടര്ന്ന് ബോണി തന്റെ സുഹൃത്തുക്കളില് ഒരാളെ വിളിച്ചു വരുത്തി. പിന്നീട് ഒമ്പത് മണിയോടെ പോലീസില് വിവരം അറിയിക്കുകയായിരുന്നു. പോലീസും മെഡിക്കല് സംഘവും എത്തിയെങ്കിലും അതിനു മുന്നേ മരണം സംഭവിച്ചിരുന്നു.