മുംബൈ: സൂചികകള്‍ നഷ്ടത്തില്‍ തുടരുമ്പോഴും വിമാനക്കമ്പനികളുടെ ഓഹരി വിലകള്‍ കുതിക്കുന്നു.
സ്പൈസ് ജെറ്റാണ് മികച്ച നേട്ടമുണ്ടാക്കിയത്. ഒരുവര്‍ഷത്തിനിടെ ഓഹരി വില ഉയര്‍ന്നത് 346 ശതമാനം. ജെറ്റ് എയര്‍വെയ്‌സാകട്ടെ 77 ശതമാനവും നേട്ടമുണ്ടാക്കി.
നവംബര്‍ 10ന് ലിസ്റ്റ് ചെയ്ത ഇന്റര്‍ ഗ്ലോബല്‍ ഏവിയേഷ(ഇന്‍ഡിഗോ)ന്റെ ഓഹരി വിലയാകട്ടെ ചുരുങ്ങിയ കാലയളവില്‍ 42 ശതമാനമാണ് ഉയര്‍ന്നത്.
അസംസ്‌കൃത എണ്ണവിലയിലെ ഇടിവും യാത്രക്കാരുടെ എണ്ണത്തിലുണ്ടായ വര്‍ധനവുമാണ് കമ്പനികള്‍ക്ക് നേട്ടമായത്.
കഴിഞ്ഞവര്‍ഷം നവംബര്‍ 24ന് 15.68 രൂപയായിരുന്ന സ്പൈസ് ജെറ്റിന്റെ ഓഹരിവില കഴിഞ്ഞദിവസം 72.50 നിരക്കിലാണ് ബിഎസ്ഇയില്‍ ക്ലോസ് ചെയ്തത്.
ഒരുമാസത്തിനിടെ മാത്രം സ്പൈസ് ജെറ്റ് 65 ശതമാനമാണ് ഉയര്‍ന്നത്. ജെറ്റ് എയര്‍വെയ്‌സാകട്ടെ 19 ശതമാനവും നേട്ടമുണ്ടാക്കി.
