സ്പാനിഷ് ലാലീഗ മത്സരങ്ങളില്‍ ബാഴ്സലോണ, അത്‌ലറ്റിക്കോ മാഡ്രിഡ് ടീമുകള്‍ക്ക് ജയം. ബാഴ്സലോണ ഒന്നിനെതിരെ രണ്ട് ഗോളുകള്‍ക്കാണ് റയല്‍ സോസിദാദിനെ പരാജയപ്പെടുത്തിയത്. മറുപടിയില്ലാത്ത ഒരു ഗോളിന് ഐബറിനെയാണ് അത്‌ലറ്റിക്കോ മാഡ്രിഡ് വീഴ്ത്തിയത്.
ജയത്തോടെ ലീഗില്‍ രണ്ടാം സ്ഥാനക്കാരായ അത്‌ലറ്റികോ മാഡ്രിഡുമായുള്ള പോയിന്റ് വ്യത്യാസം 9 ആയി പുനസ്ഥാപിച്ച ബാഴ്‌സക്ക് കിരീടം ഇനി അധികം ദൂരെയല്ല. അടുത്ത 2 മത്സരത്തില്‍ ജയിച്ചാല്‍ ബാഴ്‌സക്ക് കിരീടം ഉറപ്പിക്കാനാകും.
ബാഴ്‌സയുടെ തട്ടകമായ ക്യാമ്പ്‌നൗവില്‍ നടന്ന പോരാട്ടത്തില്‍ 45-ം മിനുറ്റില്‍ ലെംഗ്ലെറ്റ്, അറുപത്തിനാലാം മിനുറ്റില്‍ ജോര്‍ഡി ആല്‍ബ എന്നിവര്‍ ബാഴ്‌സയ്ക്കായി സ്‌കോര്‍ ചെയ്തു. അറുപത്തിരണ്ടാം മിനുറ്റില്‍ ജുവാന്മിയാണ് റയല്‍ സോസിദാദിനായി ഗോള്‍ നേടിയത്.
ഐബറിന്റെ ഹോം ഗ്രൗണ്ടില്‍ നടന്ന പോരാട്ടത്തിലാണ് അത്‌ലറ്റിക്കോ മാഡ്രിഡിന്റെ ജയം. 85-ം മിനുറ്റില്‍ ലെമറാണ് ടീമിന്റെ വിജയ ഗോള്‍ നേടിയത്.
