മലപ്പുറം : തൃശ്ശൂര്‍ സിറ്റി പൊലീസ് കമ്മിഷണര്‍ യതീഷ് ചന്ദ്രയെ അപമാനിച്ച് ഫേയ്‌സ്ബുക്ക് പോസ്റ്റിട്ട സംഭവത്തില്‍ യുവാവ് അറസ്റ്റില്‍.
മലപ്പുറം വഴിക്കടവ് കവളപൊയ്ക സ്വദേശി അജി തോമസിനെയാണ് (33) ഈസ്റ്റ് പൊലീസ് അറസ്റ്റ് ചെയ്തത്. ഫേസ്ബുക്കിലൂടെ യതീഷ് ചന്ദ്രയ്‌ക്കെതിരെ അപമാനകരമായ പരാമര്‍ശങ്ങള്‍ നടത്തിയ ഇയാള്‍ കമ്മിഷണര്‍ക്കെതിരെ അസഭ്യവര്‍ഷവും നടത്തിയതായും ഈസ്റ്റ് പൊലീസ് വ്യക്തമാക്കി.
ശബരിമല ഡ്യൂട്ടിയുമായി ബന്ധപ്പെട്ട് കമ്മീഷണര്‍ നടത്തിയ സുരക്ഷാ ഇടപെടലുകളെ തുടര്‍ന്നാണ് ചിലര്‍ സോഷ്യല്‍ മീഡിയയില്‍ അപമാനവും, വ്യാജപ്രചരണവും തുടങ്ങിയത്. സൈബര്‍സെല്‍ ശക്തമായ നിരീക്ഷണവും, അന്വേഷണവും നടത്തിയാണ് പ്രതിയെ കുടുക്കിയത്. അപവാദം പ്രചരിപ്പിച്ച 15 പേര്‍ സൈബര്‍സെല്‍ നിരീക്ഷണത്തിലാണ്.
അതേസമയം ശബരിമല ഡ്യൂട്ടിയുടെ ഭാഗമായി നിലയ്ക്കലിലെ സുരക്ഷാ ചുമതല വഹിച്ചു വരുന്ന യതീഷ് ചന്ദ്ര ഇന്ന് ഡ്യൂട്ടി അവസാനിപ്പിച്ച് മടങ്ങും.
