ന്യൂഡൽഹി: തന്റെ വേദനാജനകമായ അനുഭവങ്ങൾ പങ്ക് വെച്ച് നടിയും മോഡലുമായ സോമി അലി. മീ ടൂ ക്യാമ്പയിൻറെ ഭാഗമായാണ് സോമി തനിക്ക് ഉണ്ടായ ലൈംഗിക ചൂഷണങ്ങളെക്കുറിച്ച് പറഞ്ഞത്.
മീ ടൂ ഇന്ത്യയിൽ എത്തുന്നതിനും മുമ്പ് തന്നെ സോമി തനിക്ക് നേരെ ഉണ്ടായ ലൈംഗീക ചൂഷണങ്ങളെക്കുറിച്ച് വെളിപ്പെടുത്തിയിരുന്നു. ഇപ്പോൾ ഇൻസ്റ്റാഗ്രാമിലൂടെയാണ് നടി തന്റെ കയ്പ്പേറിയ അനുഭവങ്ങൾ നിരത്തിയിരിക്കുന്നത്.
“ഒരു ലൈംഗിക ചൂഷണത്തെ അതിജീവിച്ച ആൾ എന്ന നിലക്ക്, തങ്ങളുടെ അനുഭവങ്ങൾ വെളിപ്പെടുത്തുന്ന സ്ത്രീകളെ ഞാൻ അഭിവാദ്യം ചെയ്യുന്നു. അഞ്ചാം വയസ്സിലാണ് എനിക്ക് നേരെ ലൈംഗിക ചൂഷണം ഉണ്ടാവുന്നത്, 14-ാം വയസ്സിൽ പീഡനവും. ഇത്തരം കാര്യങ്ങളെ തുറന്ന് പറയുന്നതും അതിജീവിക്കുന്നതും എത്ര ബുദ്ധിമുട്ടുള്ള കാര്യമാണെന്ന് ഞാൻ മനസിലാക്കുന്നു, കാരണം ഞാൻ ഈ അവസ്ഥകളിലൂടെ കടന്നു പോയതാണ്. നമ്മളുമായി അടുപ്പമുള്ളവരും, നമ്മളെ സംരക്ഷിക്കേണ്ടവരും ആയിട്ടുള്ള ആളുകളോട് അത് തുറന്നു പറയുകയും, അവർ അറിഞ്ഞിട്ടും പ്രതികരിക്കാതെ ആകുന്നതും എത്ര വേദന ഉളവാക്കുന്ന കാര്യമാണ് എന്ന് എനിക്ക് വ്യക്തമായി അറിയാം. ആളുകൾ വിശ്വസിക്കില്ല എന്ന് കരുതി അത് പറയാതിരിക്കരുത്. കാരണം അത് സത്യമാണ്. ഈ അവസരത്തെ ഇല്ലാതാക്കരുത്. നിങ്ങൾക്ക് നീതി ലഭിക്കുന്ന അവസരങ്ങളാണ് ഇത്,” താരം തന്റെ ഇൻസ്റ്റാഗ്രാം കുറിപ്പിൽ പറയുന്നു.
മറ്റൊരു വീഡിയോയിൽ താരം അഭിനേത്രിയായ തനുശ്രീ ദത്തയെ പ്രത്യേകം സൂചിപ്പിക്കുന്നുണ്ട്. 90-കളിലെ സിനിമകളിൽ അഭിനയിച്ചിരുന്ന നടിയാണ് സോമി അലി.
