ചെക്ക് വാഹന നിര്‍മ്മാതാക്കളായ സ്‌കോഡയുടെ ജനപ്രിയ എക്സിക്യൂട്ടീവ് സെഡാന്‍ ഒക്ടാവിയയുടെ നാലാം തലമുറയെ ഇന്ത്യയില്‍ നിര്‍മിച്ചുതുടങ്ങിയതായി റിപ്പോര്‍ട്ട്. മഹാരാഷ്ട്രയിലെ ഔറംഗാബാദ് പ്ലാന്റില്‍ ഉല്‍പ്പാദനം ആരംഭിച്ച നാലാം തലമുറ സ്കോഡ ഒക്ടാവിയ ഈ മാസം അവസാനത്തോടെ വിപണിയില്‍ അവതരിപ്പിക്കുമെന്ന് കാര്‍ വാലെ റിപ്പോര്‍ട്ട് ചെയ്യുന്നു. വാഹനത്തിന്റെ ഡെലിവറി മെയ് അവസാനത്തോടെ ആരംഭിക്കും.
കൂടുതല്‍ ഫീച്ചറുകള്‍, മെച്ചപ്പെട്ട സ്‌റ്റൈലിംഗ്, ടര്‍ബോ പെട്രോള്‍ എന്‍ജിന്‍ എന്നിവയോടെയാണ് പുതിയ ഒക്ടാവിയ വിപണിയിലെത്തുന്നത് എന്നാണ് റിപ്പോര്‍ട്ടുകള്‍. പുതു തലമുറ സ്കോഡ ഒക്ടാവിയ സെഡാന്റെ വില 17 ലക്ഷം രൂപയില്‍ ആരംഭിക്കുമെന്നാണ് പ്രതീക്ഷിക്കുന്നത്. ഹ്യുണ്ടായ് ഇലാന്‍ട്ര ആയിരിക്കും പ്രധാന എതിരാളി. വാഹനം കഴിഞ്ഞ വര്‍ഷം സെപ്റ്റംബറില്‍ ഇന്ത്യയിലെത്തുമെന്നാണ് പ്രതീക്ഷിച്ചിരുന്നതെങ്കിലും വൈകുകയായിരുന്നു.
ആഗോളതലത്തില്‍ അനാവരണം ചെയ്ത 2020 മോഡല്‍ ഒക്ടാവിയ ചെറിയ മാറ്റങ്ങളുമായാകും ഇന്ത്യന്‍ നിരത്തില്‍ എത്തുക. നേരത്തെ പരീക്ഷണയോട്ടത്തിന് വിധേയമായ ഒക്ടാവിയയില്‍ ഡേടൈം റണ്ണിംഗ് ലൈറ്റുകള്‍, എല്‍ഇഡി ഫോഗ് ലാമ്പുകള്‍, ടെയില്‍ ലൈറ്റുകള്‍ എന്നിവയുള്ള എല്‍ഇഡി ഹെഡ്ലൈറ്റുകള്‍ ഏറെ ആകര്‍ഷകമാണ്. കൂടാതെ 17 ഇഞ്ച് റോട്ടര്‍ എയ്റോ അലോയ് വീലുകളും വശങ്ങളെ മനോഹരമാക്കുന്നു.
ഇന്ത്യയില്‍ എത്തുമ്പോല്‍ വാഹനത്തിന്റെ ഗൗണ്ട് ക്ലിയറന്‍സും കൂടുതലായിരിക്കും. ബ്രാന്‍ഡിന്റെ MQB പ്ലാറ്റ്ഫോമിലെ പുനര്‍നിര്‍മിച്ച പതിപ്പിനെ അടിസ്ഥാനമാക്കി പുതിയ സ്കോഡ ഒക്ടാവിയ അതിന്റെ മുന്‍ഗാമിയേക്കാള്‍ 19 മില്ലീമീറ്റര്‍ നീളവും 15 മില്ലീമീറ്റര്‍ വീതിയും കൂടുതലുള്ള കാറായിരിക്കും. വാഹനത്തില്‍ 2.0 ലിറ്റര്‍ ടിഎസ്ഐ പെട്രോള്‍ എഞ്ചിന്‍ മാത്രമായിരിക്കും വാഗ്ദാനം ചെയ്യുക. ഇത് 187 bhp കരുത്തും 320 Nm ടോര്‍ക്കും ഉത്പാദിപ്പിക്കും. ഏഴ് സ്പീഡ് ഡിഎസ്ജി ഓട്ടോമാറ്റിക് ഗിയര്‍ബോക്‌സ് ലഭിക്കും.
പുതിയ ഒക്ടാവിയ ഈ ഡിസംബറില്‍ വിപണിയില്‍ എത്തേണ്ടതായിരുന്നു. എന്നാല്‍ കൊവിഡ്-19 ന്റെ സാഹചര്യത്തിലാണ് കമ്പനിയുടെ പിന്നോട്ടുപോകല്‍. വിപണിയില്‍ എത്തുമ്പോള്‍ 20 മുതല്‍ 25 ലക്ഷം രൂപ വരെയായിരിക്കും വാഹനത്തിന്റെ എക്‌സ് ഷോറൂം വില. ഹോണ്ട സിവിക്, ഹ്യുണ്ടായി എലാന്‍ട്ര എന്നീ മോഡലുകളുമായാകും സ്കോഡ ഒക്ടാവിയ ഇന്ത്യയില്‍ മത്സരിക്കുക.
രാജ്യത്തെ മിഡ് പ്രീമിയം ശ്രേണിയില്‍ സ്കോഡ ഒക്ടാവിയ അതിവേഗം വളര്‍ന്നു വരുന്നുണ്ടെങ്കിലും മികച്ചൊരു വില്‍പ്പന സംഖ്യ നേടിക്കൊടുക്കാന്‍ ഇതുവരെ സാധിച്ചിട്ടില്ല. പുതിയ സ്കോഡ ഒക്ടാവിയയില്‍ അത്യാധുനികവും നവീനവുമായ സ്‌റ്റൈലിംഗ് സവിശേഷതയാകും ഇടംപിടിക്കുക. ഇത് മുന്‍ഗാമിയേക്കാള്‍ നീളവും വീതിയും ഉള്ളതിനാല്‍ വലിയ ക്യാബിനും ട്രങ്കും വാഗ്ദാനം ചെയ്യുന്നുണ്ട്. വെര്‍ച്വല്‍ കോക്ക്പിറ്റ്, ഒരു പൂര്‍ണ്ണ ടച്ച്‌സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, ഒന്നിലധികം എയര്‍ബാഗുകള്‍, ത്രീ-സോണ്‍ ക്ലൈമറ്റ് കണ്‍ട്രോള്‍, മറ്റ് നിരവധി പ്രീമിയം സവിശേഷതകള്‍ പുതിയ മോഡലില്‍ അടങ്ങിയിരിക്കുന്നു.
സ്കോഡ ഇതുവരെ നിര്‍മിച്ചത് എഴുപത് ലക്ഷം യൂണിറ്റ് ഒക്ടാവിയകള്‍ ആണെന്ന കണക്കുകളും അടുത്തിടെ പുറത്തുവന്നിരുന്നു. 70 ലക്ഷമെന്ന എണ്ണം തികച്ച ഒക്ടാവിയയെ സ്‌കോഡയുടെ മ്ലാഡ ബോലെസ്ലാവ് പ്ലാന്റില്‍നിന്നും 2020 ഫെബ്രുവരിയിലാണ് പുറത്തിറങ്ങിയത്. 1959 മുതല്‍ 1971 വരെയാണ് സ്കോഡ ഒക്ടാവിയ ആദ്യം നിര്‍മിച്ചിരുന്നത്. പിന്നീട് ആധുനിക കാലത്തെ ആദ്യ തലമുറ സ്കോഡ ഒക്ടാവിയ 1996 ല്‍ വിപണിയിലെത്തി. ഫോക്സ്വാഗണ്‍ ഗ്രൂപ്പിനുകീഴില്‍ വികസിപ്പിച്ച ആദ്യ സ്കോഡ ആയിരുന്നു ഒക്ടാവിയ.
