വെറ്റിനറി ഡോക്ടര്ക്ക് നീതി ലഭിക്കണമെന്ന് പ്രതിഷേധിച്ച് കൊണ്ടുള്ള വാര്ത്തകളാണ് ഇപ്പോള് സോഷ്യല് മീഡിയയില് നിറഞ്ഞു നില്ക്കുന്നത്. ക്രൂരമായ പീഡനത്തിനിരയായി കൊല്ലപ്പെട്ട ഡോക്ടര്ക്ക് നീതി ലഭിക്കണമെന്നും പ്രതികളെ തൂക്കി കൊല്ലണമെന്നും ആവശ്യപ്പെട്ട് പ്രായഭേദമന്യേ നിരവധി ആളുകളാണ് തങ്ങളുടെ അഭിപ്രായങ്ങള് ഫെയസ്ബുക്കുകള് വഴി രേഖപ്പെടുത്തിയിരിക്കുന്നത്.
എന്നാല് ഇപ്പോള് പ്രതികള്ക്കെതിരെ കടുത്ത പ്രതിഷേധം അറിയിച്ച് മുമ്പോട്ട് വന്നിരിക്കുന്നത് ഗായിക സയനോരയാണ്. യുവതിക്ക് നീതി ലഭിക്കണമെന്നും ഇനിയും രാജ്യത്ത് ഇത്തരം സംഭവങ്ങള് അരങ്ങേറരുതെന്നും അവര് പറയുന്നു. സ്ത്രീകള്ക്കെതിരെ ഇത്തരം ക്രൂരകൃത്യങ്ങള് നടക്കുമ്പോള് സമൂഹത്തിന്റെ ചിന്തകളെക്കുറിച്ചും നാടിന്റെ വ്യവസ്ഥിതിയെക്കുറിച്ചും ഓര്മ്മപ്പെടുത്തുകയാണ് തന്റെ ഫെയ്സ്ബുക്ക് പോസ്റ്റിലൂടെ സയനോര.
സയനോരയുടെ ഫേസ്ബുക്ക് പോസ്റ്റ്
‘പ്രിയങ്ക റെഡ്ഡിയുടെ കൂട്ടബലാത്സംഗം 8 മില്യണ് ആളുകള് പോണ് സൈറ്റുകളില് തിരഞ്ഞു അത്രേ എങ്ങോട്ടേക്കാണ് നമ്മള് പോവുന്നത്? ഇത് തിരഞ്ഞു നടക്കുന്നവര്ക്ക് അത് തന്നെ അല്ലെ സമൂഹം പഠിപ്പിച്ചു കൊടുത്തിട്ടുള്ളത്?
തങ്ങള് പീഡിപ്പിക്കപ്പെടാതിരിക്കാന് എന്തൊക്കെ ശ്രദ്ധിക്കണം, എന്തൊക്കെ ഡ്രെസ്സുകള് ഇടാതിരിക്കണം, ഏതു സമയത് യാത്രകള് ചെയ്യരുത്, സിനിമ തീയേറ്ററില് എങ്ങനെ പെരുമാറണം എന്നിങ്ങനെ ഒരു കൂട്ടം DO’S and Dont’s പെണ്കുഞ്ഞുങ്ങള്ക്ക് നമ്മള് പറഞ്ഞു കൊടുത്തു കൊണ്ടേ ഇരിക്കുന്നുണ്ട്. പക്ഷെ ഒരു പെണ്ണിനെ എങ്ങനെ ആണ് കാണേണ്ടത് എന്ന് നമ്മള് നമ്മുടെ ആണ്കുട്ടികള്ക്ക് കൊടുത്ത ക്ലാസുകള് എവിടെ?
അവളെ ഒരു സഹയാത്രികയായി, സുഹൃത്തായി, കൂടപ്പിറപ്പായി നല്ല കട്ടക്ക് നില്ക്കുന്ന പെണ് കരുത്തായി ഒക്കെ ബഹുമാനിക്കാനും സ്നേഹിക്കാനും പഠിപ്പിച്ചു കൊടുത്തിട്ടുണ്ടോ നമ്മള്? ഇവിടെ പോണ് സൈറ്റുകള് നിരോധിക്കുക അല്ല വേണ്ടത്. എല്ലാ സ്കൂളുകളിലും ആണ്കുട്ടികള്ക്കും പെണ്കുട്ടികള്ക്കും ഒരുമിച്ചു പഠിക്കാനുള്ള സംവിധാനം ഏര്പ്പാടാക്കുകയാണ് ചെയ്യേണ്ടത്.പ്രായപൂര്ത്തിയാവുന്ന കുട്ടികള്ക്കു കര്ശന ലൈംഗിക വിദ്യാഭ്യാസവും ഉറപ്പ് വരുത്തേണ്ടതുണ്ട്. അടുത്ത തലമുറയെ എങ്കിലും രക്ഷിക്കാന് പറ്റും’.