കൊച്ചി : മട്ടന്നൂരിലെ യൂത്ത് കോണ്ഗ്രസ് നേതാവായിരുന്ന ഷുഹൈബിനെ കൊലപ്പെടുത്തിയ സംഭവത്തില് സിബിഐ അന്വേഷണം ആവശ്യമില്ലെന്ന സര്ക്കാരിന്റെ അപ്പീലില് ഇന്നും വാദം തുടരും. അന്വേഷണം സിബിഐയ്ക്ക് കൈമാറിയ സിംഗിള് ബെഞ്ച് ഉത്തരവ് ചോദ്യം ചെയ്താണ് സര്ക്കാര് ഹൈക്കോടതിയില് അപ്പീല് ഹര്ജി സമര്പ്പിച്ചത്.
കേസിലുള്ള അന്വേഷണം കാര്യക്ഷമമായി നടക്കുന്നതിനാല് സി.ബി.ഐ അന്വേഷണം ആവശ്യമില്ലെന്നു കാണിച്ചാണ് സര്ക്കാര് ഡിവിഷന് ബെഞ്ചിനെ സമീപിച്ചിരിക്കുന്നത്. ഗൂഢാലോചന അടക്കം വിശദമായി അന്വേഷിച്ചതാണെന്നും അതിനാല് കേന്ദ്ര ഏജന്സി വീണ്ടും അന്വേഷിക്കേണ്ടതില്ലെന്നുമാണ് സംസ്ഥാന സര്ക്കാരിന്റെ നിലപാട്.
യൂത്ത് കോണ്ഗ്രസ് മട്ടന്നൂര് ബ്ലോക്ക് സെക്രട്ടറിയായിരുന്ന എസ്.പി ഷുഹൈബ് 2018 ഫെബ്രുവരി 12-നാണ് കൊല്ലപ്പെട്ടത്. സുഹൃത്തുക്കള്ക്കൊപ്പം തട്ടുകടയില് ഇരിക്കുകയായിരുന്ന ഷുഹൈബിനെ അക്രമികള് 37 തവണ വെട്ടിയാണ് മരണം ഉറപ്പാക്കിയത്. സി.പി.എം – കോണ്ഗ്രസ് സംഘര്ഷത്തിന്റെ ഭാഗമായിരുന്നു കൊല.