പ്രത്യേക ഷിറോണ്‍ സ്പോര്‍ട് എഡിഷന് പുറത്തിറക്കിയിരിക്കുകയാണ് ഫ്രഞ്ച് ഹൈപ്പര്‍ കാര്‍ നിര്‍മ്മാതാക്കളായ ബുഗാട്ടി ഷിറോണ്‍. കമ്പനിയുടെ 110 വര്‍ഷം പിന്നിടുന്ന പാരമ്പര്യം ഉയര്‍ത്തിപ്പിടിച്ച് പുതിയ ഷിറോണ്‍ ‘110 ആന്‍സ് ബുഗാട്ടി’ എഡിഷന് വിപണിയിലെത്തിച്ചിരിക്കുകയാണ്. മാതൃരാജ്യമായ ഫ്രാന്‍സിന്റെ ത്രിവര്‍ണ്ണ പതാകയെ ആധാരമാക്കിയാണ് ഹൈപ്പര്‍കാറിന്റെ ഒരുക്കം.
ആകെ 20 ഷിറോണ്‍ ‘110 ആന്‍സ് ബുഗാട്ടി’ യൂണിറ്റുകള്‍ മാത്രമെ കമ്പനി പുറത്തിറക്കുകയുള്ളൂ. പതിവ് ഷിറോണുകള്‍ പോലെ ഇരട്ടനിറമല്ല പുതിയ ആന്‍സ് എഡിഷന്. പുറംമോടിയില്‍ സ്റ്റീല്‍ ബ്ലൂ നിറം ഫ്രഞ്ച് ചാരുത പകരുന്നു. കാര്‍ബണ്‍ ഫൈബര്‍ നിര്‍മ്മിത ബോഡിയില്‍ വിഖ്യാത ബുഗാട്ടി ലൈന്‍ (പാസഞ്ചര്‍ കമ്പാര്‍ട്ട്മെന്റിലെ C ആകൃതി) കാണാം. അലൂമിനിയം നിര്‍മ്മിത ബുഗാട്ടി റേഡിയേറ്ററും മോഡലില്‍ ശ്രദ്ധയാകര്‍ഷിക്കും.
അലോയ് വീലുകളില്‍ പൂശിയിട്ടുള്ള മാറ്റ് ബ്ലാക്ക് നിറം ആന്‍സ് എഡിഷന് കോണ്‍ട്രാസ്റ്റ് പ്രഭാവമേകുന്നു. തിളക്കമുള്ള നീല നിറമാണ് ബ്രേക്ക് കാലിപ്പറുകള്‍ക്ക്. പോളിഷ് ചെയ്ത അലൂമിനിയം ഫില്ലര്‍ ക്യാപ്പും കാറില്‍ പരാമര്‍ശിക്കണം. പിറകില്‍ ഡിഫ്യൂസറിന്റെയും ബമ്പറിന്റെയും നീലത്തിളക്കം ഒറ്റനോട്ടത്തിലെ കണ്ണിലുടക്കും. എക്സ്ഹോസ്റ്റ് സംവിധാനത്തിന് മാറ്റ് ബ്ലാക്ക് ശൈലി നല്‍കാനാണ് കമ്പനി തീരുമാനിച്ചിരിക്കുന്നത്.
