മുന് ഓസീസ് പേസര് ഷോണ് ടൈറ്റ് പുതുച്ചേരി രഞ്ജി ടീം പരിശീലക സംഘത്തിലേക്ക്. വരുന്ന സീസണില് ടീമിന്റെ ബൗളിംഗ് പരിശീലകനായാണ് ടൈറ്റ് പ്രവര്ത്തിക്കുക. അടുത്തിടെ താരം അഫ്ഗാനിസ്ഥാന് ദേശീയ ടീമിന്റെ ബൗളിംഗ് പരിശീലകനായും ചുമതലയേറ്റിരുന്നു. അഫ്ഗാനിസ്ഥാനില് അഞ്ച് മാസത്തേക്കാണ് താരത്തിന്റെ കരാര്.
ഈ മാസാവസാനത്തോടെ ടൈറ്റ് പുതുച്ചേരി ടീമിനൊപ്പം ചേരും. ഇതിനിടെ അഫ്ഗാന് ടീമില് നിന്ന് വിളി വന്നാല് അവര്ക്കൊപ്പം ചേരുകയും അഫ്ഗാനിസ്ഥാനിലെ ജോലി കഴിഞ്ഞ് പുതുച്ചേരിയിലേക്ക് മടങ്ങിയെത്തുകയും ചെയ്യും.
ഓസ്ട്രേലിയക്കായി 35 ഏകദിങ്ങളും 21 ടി-20 മത്സരങ്ങളും കളിച്ചിട്ടുള്ള താരമാണ് ടൈറ്റ്. ഏകദിനങ്ങളില് 62 വിക്കറ്റുകള് ഉള്ള താരം ടി-20 രാജ്യാന്തര കരിയറില് 28 വിക്കറ്റുകള് നേടിയിട്ടുണ്ട്. ഐപിഎല് അടക്കം വിവിധ ടി-20 ലീഗുകളിലും താരം കളിച്ചിട്ടുണ്ട്. ലോകത്തെ ഏറ്റവും വേഗത ബൗളര്മാരില് ഒരാളാണ് ടൈറ്റ്. മണിക്കൂറില് 161.1 കിലോമീറ്റര് വേഗതയില് താരം പന്തെറിഞ്ഞിട്ടുണ്ട്. 2017ല് ടൈറ്റ് രാജ്യാന്തര ക്രിക്കറ്റില് നിന്ന് വിരമിച്ചു.
അടുത്ത രഞ്ജി ട്രോഫി സീസണ് ജനുവരി 13 മുതല് ആരംഭിക്കും. ടീമുകളെ 6 ഗ്രൂപ്പുകളാക്കി തിരിച്ചാവും മത്സരങ്ങള്. ടീമുകള് അഞ്ച് ദിവസത്തെ നിര്ബന്ധിത ക്വാറന്റീന് കാലാവധി പൂര്ത്തിയാക്കിയതിനു ശേഷം രണ്ട് ദിവസത്തെ പരിശീലനത്തിന് അനുവദിക്കും. ബാംഗ്ലൂര്, കൊല്ക്കത്ത, മുംബൈ, ചെന്നൈ, തിരുവനന്തപുരം, അഹ്മദാബാദ് എന്നിവിടങ്ങളിലാണ് മത്സരങ്ങള്. കൊവിഡ് വ്യാപനത്തെ തുടര്ന്ന് ഇക്കൊല്ലത്തെ രഞ്ജി ട്രോഫി റദ്ദാക്കിയിരുന്നു.