തിരുവനന്തപുരം: തുലാഭാരം നടത്തുന്നതിനിടെ ത്രാസ് പൊട്ടി വീണ് പരിക്കേറ്റ് ചികിത്സയിലുള്ള ശശി തരൂരിനെ കേന്ദ്രമന്ത്രി നിര്മല സീതാരാമന് സന്ദര്ശിച്ചു.
തെരെഞ്ഞെടുപ്പ് തിരിക്കിനിടയിലും തന്നെ സന്ദര്ശിച്ചിതിനില് തരൂര് സന്തോഷം പങ്കുവച്ചു. ട്വിറ്റലാണ് നിര്മ്മല സീതാരാമന് നന്ദി അറിയിച്ചത്. നിര്മ്മല സീതാരാമന് കാണിച്ച മര്യാദ രാഷ്ട്രീയക്കാരില് അപൂര്വ്വമാണെന്നും തരും ട്വിറ്ററില് കുറിച്ചു.
ശശിതരൂരിന്റെ ആരോഗ്യനില തൃപ്തികരമാണെന്ന് തിരുവനന്തപുരം മെഡിക്കല് കോളേജ് ആശുപത്രി അധികൃതര് അറിയിച്ചു. തലയിലെ മുറിവില് ആറ് തുന്നലുണ്ട്. അദ്ദേഹം ന്യൂറോ സര്ജറി ഐസിയുവില് നിരീക്ഷണത്തിലാണ്. ഇന്ന് വിശദമായ പരിശോധന നടത്തിയ ശേഷം ചികിത്സ തുടരുന്നത് സംബന്ധിച്ച് തീരുമാനമെടുക്കുമെന്ന് മെഡിക്കല്കോളേജ് സൂപ്രണ്ട് അറിയച്ചു.
അതേസമയം തുലാഭാരത്തിനിടെ ത്രാസ് പൊട്ടിവീണ് ശശി തരൂരിന് പരിക്കേറ്റ സംഭവത്തില് ഗൂഢാലോചനയുണ്ടെന്ന ആരോപണവുമായി ജില്ലാ കോണ്ഗ്രസ് കമ്മിറ്റി രംഗത്തെത്തി. അപകടത്തെക്കുറിച്ച് അന്വേഷണം വേണമെന്ന് ജില്ലാ കോണ്ഗ്രസ് നേതൃത്വം ആവശ്യപ്പെട്ടു. ജില്ലാ കോണ്ഗ്രസ് പ്രസിഡന്റ് സനല് കുമാര് തമ്പാനൂര് പൊലീസിന് ഇതു സംബന്ധിച്ച പരാതി നല്കി. അപകടത്തെ തുടര്ന്ന് തരൂരിന്റെ ഇന്നത്തെ പ്രചാരണ പരിപാടികള് റദ്ദാക്കിയിരുന്നു.
തുലാഭാരത്രാസ്സില് പ്രവര്ത്തകര് തൂങ്ങിയത് കൊണ്ടാണ് ചങ്ങല പൊട്ടിപ്പോയതെന്ന് ക്ഷേത്രം ഭാരവാഹികള് വിശദീകരിച്ചിരുന്നു.
നിര്ദ്ദേശം അനുസരിക്കാതെ പ്രവര്ത്തകര് ആവശ്യത്തിലധികം പഞ്ചസാര തുലാഭാരത്തട്ടില് എടുത്തുവച്ചെന്ന് ക്ഷേത്രം സെക്രട്ടറി ആര് പി നായര് പറഞ്ഞു.
കൂടാതെ പ്രവര്ത്തകര് ചങ്ങലയില് പിടിച്ചു തൂങ്ങുകയും ചെയ്തു. ഇതിനിടെ ഭാരം താങ്ങാന് വച്ചിരുന്ന സ്റ്റൂള് ആരോ എടുത്തുമാറ്റിയെന്നും ക്ഷേത്രം സെക്രട്ടറി പറഞ്ഞു. പെട്ടെന്ന് ഭാരം വന്നപ്പോള് ചങ്ങലയുടെ കൊളുത്ത് നിവര്ന്ന് ത്രാസ് പൊട്ടുകയായിരുന്നുവെന്നും ക്ഷേത്രം സെക്രട്ടറി വ്യക്തമാക്കി.