ശ്രീലങ്കൻ ക്രിക്കറ്റ് താരം മുത്തയ്യ മുരളീധരൻെറ ജീവിത കഥ പറയുന്ന ‘800’ എന്ന ചിത്രത്തിൽ പ്രധാനവേഷം ചെയ്യുന്ന തമിഴ് നടൻ വിജയ് സേതുപതിക്കെതിരെ ട്വിറ്ററിൽ ഷെയിം ഹാഷ്ടാഗ്. ഷെയിം ഓൺ യൂ വിജയ് സേതുപതി എന്ന ഹാഷ്ടാഗാണ് ട്വിറ്ററിൽ ട്രെൻഡിങ്ങിലെത്തിയിരിക്കുന്നത്. സേതുപതിയെ ബഹിഷ്കരിക്കുക എന്ന ഹാഷ്ടാഗും ട്രെൻഡിങ്ങിലുണ്ട്. മുത്തയ്യ മുരളീധരനായി സേതുപതി എത്തുന്ന ചിത്രത്തിൻെറ മോഷന്‍ പോസ്റ്റര്‍ കഴിഞ്ഞ ദിവസം പുറത്തുവന്നിരുന്നു. ഇതോടെയാണ് സേതുപതിക്കെതിരെ വിമര്‍ശനം ശക്തമായത്.
മുത്തയ്യ മുരളീധരന്‍ വംശഹത്യ സംഘത്തിലെ അംഗമാണെന്നും, വിജയ് സേതുപതി തമിഴ് സിനിമക്ക് അപമാനമാണെന്നുമുള്ള വാദങ്ങളുമായാണ് ഒരു വിഭാഗം രംഗത്തെത്തിയിരിക്കുന്നത്. ശ്രീലങ്കന്‍ സര്‍ക്കാര്‍ രാജ്യത്തെ തമിഴരെ അടിച്ചമര്‍ത്തുന്നവരാണെന്നും, ആ രാജ്യത്തെ പ്രതിനിധീകരിച്ച് മത്സരിച്ച ഒരു ക്രിക്കറ്റ് താരത്തെ വിജയ് സേതുപതി അവതരിപ്പിക്കുന്നത് അന്യായമാണെന്നും ട്വിറ്ററാറ്റികള്‍ വാദിക്കുന്നു.
