റിയാദ്: വിസകളുടെ കാലാവധി നീട്ടി നൽകി സൗദി.സൗദിയിലേക്ക് പ്രവേശന വിലക്കുള്ള രാജ്യങ്ങളില്‍ കുടുങ്ങിക്കിടക്കുന്നവരുടെ റെഡിഡന്‍സ് വിസ അഥവാ ഇഖാമ, എക്‌സിറ്റ് ആന്റ് റീ-എന്‍ട്രി വിസ, വിസിറ്റ് വിസ എന്നിവയുടെ കാലാവധി ജൂലൈ 31 വരെ നീട്ടിയതായി സൗദി ജവാസാത്ത്. ഇന്ത്യ ഉള്‍പ്പെടെയുള്ള രാജ്യങ്ങളിലുള്ള പ്രവാസികള്‍ക്ക് ആശ്വാസം പകരുന്നതാണ് ജനറല്‍ ഡയരക്ടറേറ്റ് ഓഫ് പാസ്‌പോര്‍ട്ട്‌സിന്റെ തീരുമാനം.
സൗദി ഭരണാധികാരി സല്‍മാന്‍ രാജാവിന്റെ നിര്‍ദ്ദേശ പ്രകാരമാണ് വിസകളുടെ കാലാവധി ധനകാര്യ വകുപ്പ് മന്ത്രി നീട്ടി നല്‍കിയതെന്ന് സൗദി പ്രസ് ഏജന്‍സി അറിയിച്ചു. കൊവിഡ് സാഹചര്യത്തില്‍ സ്വദേശികളുടെയും വിദേശികളുടെയും ആരോഗ്യ സുരക്ഷ ഉറപ്പുവരുത്തുന്നതിനും പ്രതിസന്ധി ഘട്ടത്തില്‍ സാമ്പത്തിക പ്രയാസങ്ങള്‍ ലഘൂകരിക്കുന്നതിന് വേണ്ടിയുമാണ് ഇത്തരമൊരു തീരുമാനം സല്‍മാന്‍ രാജാവ് കൈക്കൊണ്ടതെന്നും ഏജന്‍സി അറിയിച്ചു.
