ദോഹ: ഖത്തര് ലോകകപ്പില് അട്ടിമറിയുടെ ആദ്യ നൊമ്പരമറിഞ്ഞ് അര്ജന്റീന. ലുസൈല് സ്റ്റേഡിയത്തിലെ ആവേശപ്പോരില് ഒരു ഗോളിന് പിന്നില് നിന്ന ശേഷം ഇരട്ട ഗോളുമായി സൗദി അറേബ്യയാണ് ലാറ്റിനമേരിക്കന് ചാമ്പ്യന്മാര്ക്ക് ആദ്യ ഗ്രൂപ്പ് മത്സരത്തില് തോല്വി സമ്മാനിച്ചത്. അര്ജന്റീനക്കായി ലിയോണല് മെസിയും സൗദിക്കായി സലേ അല്ഷെഹ്രിയും സലീം അല്ദാവസാരിയും ഗോൾ നേടി
48-ാം മിനുറ്റില് സലേ അല്ഷെഹ്രിയും 53-ാം മിനുറ്റില് സലീം അല്ദാവസാരിയുമാണ് സൗദിക്കായി ഗോള്വല പൊട്ടിച്ചത്. പിന്നീട് തലതവണ അര്ജന്റീന തിരിച്ചുവരവിന് ശ്രമിച്ചെങ്കിലും സൗദി ഗോളി വിലങ്ങുതടിയായി. നേരത്തെ മെസ്സിയാണ് അർജന്റീനക്ക് വേണ്ടി പെനാൽറ്റിയിലൂടെ ഗോൾ നേടിയത്. പരേഡസിനെ അല് ബുലാഹി ബോക്സില് വീഴ്ത്തിയപ്പോള് വാര് പരിശോധനയിലൂടെ റഫറി പെനാൽറ്റി വിധിക്കുകയായിരുന്നു.
രണ്ടാംപകുതിയുടെ തുടക്കത്തില് തന്നെ സൗദി ഇരട്ട മറുപടി നല്കിയതോടെ അര്ജന്റീനന് പ്രതിരോധത്തിലെ പാളിച്ചകളെല്ലാം മറനീക്കി പുറത്തുവരുന്നത് പ്രകടമായിരുന്നു. 22-ാം മിനുറ്റില് ലിയോ രണ്ടാം ഗോള് നേടിയെങ്കിലും റഫറി ഓഫ്സൈഡ് വിളിച്ചു. ലൗറ്റാരോ മാര്ട്ടിനസിന്റെ ഗോളും ഓഫ്സൈഡിന് വഴിമാറി. 35-ാം മിനുറ്റില് മാര്ട്ടിസിന്റെ ശ്രമവും വീണ്ടും ഓഫ്സൈഡിന് വഴിമാറി.