പറവൂർ: ആർഎസ്എസുമായി കൂട്ടുകൂടിയ വി ഡി സതീശൻ പ്രതിപക്ഷ നേതൃസ്ഥാനവും എംഎൽഎ സ്ഥാനവും രാജിവെയ്ക്കണമെന്നും എഐവൈഎഫ് ജനറൽ സെക്രട്ടറി ടി ടി ജിസ്‌മോൻ ആവശ്യപ്പെട്ടു. സതീശനെയും വി ഡി സവർക്കറേയും തിരിച്ചറിയാൻ കഴിയാത്ത സ്ഥിതിയാണ് കേരളത്തിലെന്നും ജിസ്‌മോൻ പറഞ്ഞു. പ്രതിപക്ഷനേതാവ് വി ഡി സതീശൻ ആർഎസ്എസുമായി കൂട്ടുകൂടുകയാണ്. ഇത് അവസാനിപ്പിച്ച് സതീശൻ കേരളത്തോട് മാപ്പ് പറയണമെന്ന് ടി ടി ജിസ്‌മോൻ പറഞ്ഞു.
ഹിന്ദു ഐക്യവേദി നേതാവ് ആർ വി ബാബുവിന്‍റെ ആരോപണങ്ങൾക്ക് എതിരെ എന്ത് കൊണ്ട് സതീശൻ നിയമ നടപടി സ്വീകരിക്കുന്നില്ലെന്നും അദ്ദേഹം ചോദിച്ചു. പ്രതിപക്ഷനേതാവ് വർഗീയ ശക്തികളോട് കൂട്ടുകൂടുന്നുവെന്നാരോപിച്ച് പറവൂരിലെ സതീശന്റെ എംഎൽഎ ഓഫീസിലേക്ക് എഐവൈഎഫ് മാർച്ച്‌ നടത്തി. മാർച്ച്‌ പൊലീസ് തടഞ്ഞു.
കഴിഞ്ഞ ദിവസങ്ങളില്‍ പ്രതിപക്ഷ നേതാവ് വിഡി സതീശനും സംഘപരിവാറും തമ്മിലുള്ള പോര് മുറുകിയിരുന്നു. സതീശനെതിരെ ആരോപണവുമായി ആര്‍ വി ബാബുവാണ് രംഗത്തെത്തിയത്. വി ഡി സതീശൻ ആര്‍എസ്എസിനോട് വോട്ട് ചോദിച്ചുവെന്നാണ് ആരോപണം.
